ഗാസ സിറ്റി: ഗാസയിലേക്കുള്ള ഭക്ഷ്യവസ്തുക്കൾ അടങ്ങിയ നൂറോളം സഹായ ലോറികൾ കൊള്ളയടിച്ചതായി പലസ്തീൻ അഭയാർത്ഥികൾക്കായുള്ള യു.എൻ ഏജൻസി (ഉനർവ). തെക്കൻ ഗാസയിലേക്കുള്ള വണ്ടികൾ ഇസ്രയേൽ നിയന്ത്രിത കെരെം ഷാലോം ക്രോസിംഗിലൂടെ കടന്നുപോയപ്പോൾ അവരുടെ ഡ്രൈവർമാർ തോക്കിൻമുനയിൽനിന്ന് സഹായം ഇറക്കാൻ നിർബന്ധിതരായതായും 97 ലോറികൾ നഷ്‌ടപ്പെട്ടുവെന്നും ‘ഉനർവ’ അറിയിച്ചു.
മുഖംമൂടി ധരിച്ചവർ വാഹനവ്യൂഹത്തിനുനേരെ ഗ്രനേഡ് എറിഞ്ഞ് ആക്രമണം നടത്തിയതായും ദൃക്‌സാക്ഷികൾ പറഞ്ഞു. കുറ്റവാളികളെ തിരിച്ചറിഞ്ഞില്ലെന്നും ഗാസയിലെ സിവിൽ ക്രമം ആകെ തകർന്ന് പ്രവർത്തനം അസാധ്യമായ അന്തരീക്ഷമായി മാറിയിരിക്കുന്നു എന്നാണ് ഇത് അർത്ഥമാക്കുന്നതെന്നും ഉനർവ കമീഷണർ ജനറൽ ഫിലിപ്പ് ലസാരിനി പറഞ്ഞു. ഉടനടി ഇടപെടലില്ലാത്തപക്ഷം മനുഷ്യത്വപരമായ സഹായത്തെ ആശ്രയിക്കുന്ന 20 ലക്ഷം ആളുകൾക്ക് അതിജീവിക്കാനാവാത്ത വിധം ഭക്ഷ്യക്ഷാമം രൂക്ഷമാകുമെന്നും അദ്ദേഹം പറഞ്ഞു.
വടക്കൻ ഗാസ മുനമ്പിലെ പ്രദേശങ്ങളിൽ ക്ഷാമം ആസന്നമായിരിക്കാനുള്ള ശക്തമായ സാധ്യത ഉണ്ടെന്ന് ഈ മാസം ആദ്യം യു.എൻ മുന്നറിയിപ്പ് നൽകിയിരുന്നു. 2023 ഒക്ടോബറിൽ ഇസ്രയേലും ഹമാസും തമ്മിലുള്ള യുദ്ധം ആരംഭിച്ചതിനു ശേഷം എപ്പോഴത്തേക്കാളും കുറച്ച് സഹായ ലോറികൾ കഴിഞ്ഞ മാസം ഗാസയിലേക്ക് പ്രവേശിച്ചിരുന്നു.
