ചെന്നൈ: തമിഴ് താരം ശിവകാർത്തികേയൻ നായകനായെത്തി രാജ്കുമാർ പെരിയസാമി സംവിധാനം ചെയ്ത അമരന് ആദ്യ ദിനം തന്നെ വൻ കളക്ഷൻ ലഭിച്ചിരിക്കുകയാണ്. 2024-ൽ ഏറ്റവും കൂടുതൽ കളക്ഷൻ നേടിയ നാലാമത്തെ തമിഴ് ഓപ്പണറായിരിക്കുകയാണ് ശിവകാർത്തികേയൻ പട്ടാള വേഷത്തില്‍ എത്തിയിരിക്കുന്ന ബയോപിക് ചിത്രം. സായി പല്ലവി നായികയായി എത്തിയ ചിത്രം കോളിവുഡിലെ ഏറ്റവും പ്രതീക്ഷ അര്‍പ്പിച്ച ദീപാവലി റിലീസായിരുന്നു.
ALSO READ: ഇന്ത്യൻ സിനിമയുടെ സൗന്ദര്യ ശിൽപ്പത്തിന് ഇന്ന് പിറന്നാൾ
ഇൻഡസ്ട്രി ട്രാക്കർ സാക്നിൽക് അനുസരിച്ച് റിലീസ് ദിനത്തിൽ അമരൻ 21.65 കോടി രൂപയുടെ ഇന്ത്യൻ നെറ്റ് കളക്ഷൻ നേടി. തമിഴ് പതിപ്പ് 17 കോടി രൂപയാണ് ആദ്യദിന കളക്ഷന്‍ നേടിയത്. തെലുങ്ക്, ഹിന്ദി, കന്നഡ, മലയാളം പതിപ്പുകൾ യഥാക്രമം 40 ലക്ഷം, 15 ലക്ഷം, 2 ലക്ഷം, ഒരു ലക്ഷം രൂപ നേടി. ചിത്രം ഈ വർഷത്തെ ഏറ്റവും കൂടുതൽ കളക്ഷൻ നേടിയ ആദ്യ അഞ്ച് തമിഴ് ചിത്രങ്ങളിൽ ഇടംപിടിക്കാൻ സാധ്യതയുണ്ടെന്നാണ് ട്രേഡ് അനലിസ്റ്റുകള്‍ വിലയിരുത്തുന്നത്.
അമരന്‍റെ സംസ്ഥാന തിരിച്ചുള്ള ഗ്രോസ് കളക്ഷനില്‍ തമിഴ്നാട്ടില്‍ 16.8 കോടി, കേരളത്തില്‍ 1.2 കോടി, കര്‍ണാടകയില്‍ 1.9 കോടി, തെലുങ്ക് സംസ്ഥാനങ്ങളില്‍ 4.5 കോടി, റെസ്റ്റ് ഓഫ് ഇന്ത്യ 0.6 കോടി എന്നിങ്ങനെയാണ്. ശിവകാര്‍ത്തികേയന്‍റെ കരിയറിലെ തന്നെ ഏറ്റവും വലിയ ഓപ്പണിംഗാണ് ചിത്രം നേടിയിരിക്കുന്നത്. തീയേറ്ററുകളിൽ ഓളം സൃഷ്ടിച്ചുകൊണ്ട് പ്രേക്ഷകർ ഒഴുകി എത്തുന്നതായാണ് വിവരം.
