അറഫ: ഹജ്ജിന്റെ പ്രധാന കര്‍മമായ അറഫാസംഗമം ഇന്ന്. ഇരുപത് ലക്ഷത്തിലേറെ ഹജ്ജ് തീര്‍ത്ഥാടകര്‍ അറഫയില്‍ സംഗമിക്കും. ഉച്ചയ്ക്ക് അറഫ പ്രഭാഷണത്തോടെ ചടങ്ങുകള്‍ ആരംഭിക്കും. സ്ഥലത്ത് വന്‍ സുരക്ഷാസന്നാഹമാണ് ഏര്‍പ്പെടുത്തിയിട്ടുള്ളത്. ഹജ്ജിനെത്തിയ ലക്ഷക്കണക്കിന് ഹാജിമാര്‍ ഇന്ന് അറഫയില്‍ സംഗമിക്കും. ഹജ്ജിലെ പ്രധാന കര്‍മ്മമാണിത്. അറഫയിലെത്തി സംഗമിക്കുന്ന ഹാജിമാര്‍ പാപമോചന പ്രാര്‍ത്ഥനകളിലും ആരാധനാ കര്‍മ്മങ്ങളിലും മുഴുകും. പിന്നീട് ഹജ്ജ് കര്‍മ്മങ്ങളുടെ മറ്റൊരു പ്രധാന കേന്ദ്രമായ മുസ്ദലിഫയിലേക്ക് നീങ്ങും.
അറഫാ സംഗമത്തിലെ തിരക്ക് കണക്കിലെടുത്ത് പ്രായമായവരും അവശയതയുള്ളവരുമായ ഹാജിമാര്‍ക്ക് പ്രത്യേക സൗകര്യം ഒരുക്കിയാണ് എത്തിച്ചിട്ടുള്ളത്. വിവിധ രാജ്യങ്ങളില്‍ നിന്നുള്ള ഹാജിമാര്‍ ഒരേ മനസ്സോടെ ഒത്തുചേരുന്ന അപൂര്‍വ്വ സംഗമ വേദി കൂടിയാണ് അറഫ. 160ലധികം രാജ്യങ്ങളില്‍ നിന്നായി 20 ലക്ഷത്തോളം ഹാജിമാര്‍ എത്തിയെന്നാണ് കണക്ക്.
