തമിഴ്നാട് പ്രിമിയര് ലീഗില് ഇന്ത്യന് ഇതിഹാസ സ്പിന് ബൗളര് ആര്. അശ്വിനെ നോണ് സ്ട്രൈക്ക് എന്ഡില് വെച്ച് റണ്ണൗട്ടാക്കാന് നെല്ലായി സ്ട്രൈക്കേഴിസിന്റെ മോഹന് പ്രസാദ് ശ്രമിച്ചിരുന്നു. ഡിണ്ടിഗല് ഡ്രാഗണ്സും നെല്ലായി സ്ട്രൈക്കേഴ്സും തമ്മിലുള്ള മത്സരത്തിനിടയിലായിരുന്നു സംഭവം.
മത്സരത്തിന്റെ 15-ാം ഓവറിലായിരുന്നു സംഭവം. നോണ് സ്ട്രൈക്കേഴ്സ് എന്ഡില് വെച്ച് റണ്ണൗട്ടിനുള്ള വാണിങ് കൊടുക്കുകയായിരുന്നു പ്രസാദ്. മുമ്പ് മന്കാദിങ് എന്ന പേരിലായിരുന്നു ഈ റണ്ണൗട്ട് അറിയപ്പെട്ടിരുന്നത്. ബാറ്റര്മാര്ക്ക് അന്യായമായി കിട്ടുന്ന നേട്ടം തടയുന്നതിനാണ് ഈ റണ്ണൗട്ട്. എം.സി.സിയുടെ ക്രിക്കറ്റ് നിയമങ്ങള് ഇതിന് അംഗീകാരവും നല്കിയിട്ടുണ്ട്.
എന്നാല് അശ്വിന് ഇവിടെ ഒരു അഡ്വാന്റേജ് എടുക്കാനും ശ്രമിച്ചിട്ടില്ല. ബൗളര് വിക്കറ്റ് വീഴിത്താന് ശ്രമിച്ചപ്പോള് അദ്ദേഹത്തിന്റെ ബാറ്റ് ക്രീസില് തന്നെയുണ്ടായിരുന്നു. അശ്വിന് തന്നെ തന്റെ ‘എക്സ്’ അക്കൗണ്ടിലാണ് ഇത് പങ്കുവെച്ചത്. ‘ അവര്ക്ക് നിയമം അറിയില്ല’ എന്നും താരം അടിക്കുറിപ്പ് നല്കിയിരുന്നു.
ആ സമയത്ത് ‘അശ്വിന്റെ ആയുധം അശ്വിനെതിരെ തന്നെ ഉപയോഗിക്കുകയാണ്’ എന്ന് കമന്റേറ്റര്മാര് പറഞ്ഞിരുന്നു. ഇതിനെതിരെയാണ് അശ്വിന് അവര്ക്ക് നിയമങ്ങളൊന്നുമറിയില്ലെന്ന് പറഞ്ഞത്.
ക്രിക്കറ്റ് അനലിസ്റ്റ് ജോണ്സ് പങ്കുവെച്ച പോസ്റ്റിന് മറുപടിയുമായിട്ടായിരുന്നു അശ്വിന് എത്തിയത്. ഈ റണ്ണൗട്ടിന്റെ നിയമം എന്താണെന്നും താരം പോസ്റ്റില് കുറിക്കുന്നുണ്ട്. അശ്വിന് പിന്തുമയുമായി ഒരുപാട് പേരെത്തിയിട്ടുണ്ട്.
അതേസമയം മത്സരത്തില് അശ്വിന് നായകനായ ഡിണ്ടിഗല് ഡ്രാഗണ്സ് പരാജയപ്പെട്ടിരുന്നു. ഡിണ്ടിഗല് ഉയര്ത്തിയ 137 റണ്സിന്റെ വിജയലക്ഷ്യം നെല്ലായി അനായാസം മറികടക്കുകയായിരുന്നു.