കൊൽക്കത്ത: ഐഎസ്എല്‍ ഫുട്‌ബോളില്‍ കൊൽക്കത്തയ്‌ക്കെതിരെ പൊരുതാൻ ശത്രുപാളയത്തിലേക്ക് കേരള ബ്ലാസ്റ്റേഴ്സ്. ഐ.എസ്.എല്ലിലേക്ക് പുതുതായി സ്ഥാനക്കയറ്റം ലഭിച്ച മുഹമ്മദൻ സ്പോർട്ടിങ്ങുമായാണ് കൊമ്പന്മാരുടെ പടയൊരുക്കം. സ്വന്തം മണ്ണിൽ ആദ്യ ജയം ലക്ഷ്യമിടുന്ന കൊൽക്കത്തയ്ക്ക് നേരിടേണ്ടി വരുന്നത് പോയന്റ് നിലയിൽ മുന്നോട്ടുകയറാൻ പരിശ്രമിക്കുന്ന മഞ്ഞ പടയെയാണ്.
കൊൽക്കത്ത ഡെർബിയിൽ എതിരില്ലാത്ത കാൽഡസൻ ഗോളിന് മോഹൻ ബഗാന് മുന്നിൽ വീണ ക്ഷീണവുമായാണ് മുഹമ്മദൻസ് ഇന്ന് ബൂട്ടുകെട്ടുന്നത്. നാലു കളികളിൽ ആന്ദ്രെ ചെർനിഷോവ് പരിശീലിപ്പിക്കുന്ന ടീമിന്റെ സമ്പാദ്യം നാലു പോയന്റ് മാത്രം.
Also Read: ടെസ്റ്റ് ക്രിക്കറ്റ് ചരിത്രത്തിലെ അതുല്യ റെക്കോഡ് ഇനി ഇന്ത്യയുടെ പേരിൽ
പോയന്റ് പട്ടികയിൽ 10ാമതും. ഇന്നും ജയിക്കാനായില്ലെങ്കിൽ സ്വന്തം മൈതാനത്തെ ആദ്യ മൂന്നു കളികളിലും ജയം പിടിക്കാനാവാത്ത ജംഷഡ്പൂർ, ഈസ്റ്റ് ബംഗാൾ, പഞ്ചാബ് ടീമുകൾക്കൊപ്പമാകും മുഹമ്മദൻസിനും ഇടം. മറുവശത്ത്, അവസാനം കളിച്ച രണ്ടു മത്സരങ്ങളിലും സമനിലയിൽ കുരുങ്ങിയാണ് ബ്ലാസ്റ്റേഴ്സ് എത്തുന്നത്.
ഇടവേള കഴിഞ്ഞിറങ്ങുമ്പോൾ സൂപ്പർ താരം അഡ്രിയൻ ലൂണകൂടി ആദ്യ ഇലവനിലുണ്ടെന്നതാണ് ഏറ്റവും വലിയ കരുത്ത്. ലൂണക്കൊപ്പം നോഹ സദാഊയികൂടി ചേരുമ്പോൾ ഏതുനിരക്കും ശരിക്കും ഭീഷണി ഉയർത്താൻ മഞ്ഞപ്പടക്കാകും. എന്നാൽ, എവേ മത്സരങ്ങളിലെ തലവേദന തീർക്കൽ കേരള ബ്ലാസ്റ്റേഴ്സിന് ലക്ഷ്യമാണ്. ടീം അവസാനം കളിച്ച ഒമ്പത് എവേ കളികളിൽ ഒരു ജയം മാത്രമാണ് സമ്പാദ്യം.
