കൊച്ചി: മദ്യ ലഹരിയിൽ ട്രെയിനുകളിൽ ബോംബ് വെച്ചെന്ന് ഭീഷണി മുഴക്കിയ പ്രതിയെ പോലീസ് അറസ്റ്റ് ചെയ്തു. പത്തനംതിട്ട സ്വദേശി ഹരിലാലിനെയാണ് പോലീസ് പെരുമ്പാവൂരിൽ നിന്ന് പിടികൂടിയത്. യാത്ര ചെയ്യുന്നതിനിടെയാണ് പ്രതി മൂന്ന് ട്രെയിനുകളിൽ ബോംബ് വെച്ചിച്ചുണ്ടെന്ന് ഭീഷണിപ്പെടുത്തുന്നത്. പ്രതിയെ എറണാകുളം റെയിൽവെ പോലീസ് സെൻട്രൽ പോലീസിന് കൈമാറും.
പോലീസ് കൺട്രോൾ റൂമിലേക്ക് വിളിച്ച് തൻ്റെ കാശ് പോയെന്ന് പ്രതി കഴിഞ്ഞ ദിവസം പരാതി പറഞ്ഞിരുന്നു. പോലീസ് അന്വേഷിച്ചപ്പോൾ ഇയാൾ മദ്യലഹരിയിലാണെന്നും സംഭവം വ്യാജമാണെന്നും മനസിലായി. തുടർന്ന് നടത്തിയ അന്വേഷണത്തിലാണ് പ്രതിയെ പിടിക്കൂടിയത്.
Also Read: മദ്യലഹരിയിൽ വാഹനം ഓടിച്ച ഡ്രൈവർ അറസ്റ്റിൽ
സൗത്ത് റെയിൽവേ സ്റ്റേഷനിലെ തട്ടുകടയിൽ ജോലിക്ക് വന്നയാളാണ് പ്രതിയെന്നാണ് പോലീസിന് ലഭിക്കുന്ന വിവരം. ഭീഷണി സന്ദേശത്തെ തുടർന്ന് സംസ്ഥാനത്ത് വ്യാപകമായി ട്രെയിനുകളിൽ പോലീസ് പരിശോധന നടത്തുകയും എല്ലാ റെയിൽവേ സ്റ്റേഷനുകളിൽ ജാഗ്രതാ നിർദ്ദേശം നൽകുകയും ചെയ്തിരുന്നു.
