മുംബൈ: മുംബൈയുടെ കോട്ടയിൽ തകർന്നടിഞ്ഞ് കേരള ബ്ലാസ്റ്റേഴ്‌സ്. മുംബൈ ഫുട്‌ബോൾ അരീനയിൽ നടന്ന മുംബൈ സിറ്റി എഫ്‌സിക്കെതിരായ മത്സരത്തിൽ രണ്ടിനെതിരെ നാല് ഗോളുകൾക്ക് ബ്ലാസ്റ്റേഴ്‌സ് തോൽവി വഴങ്ങുകയായിരുന്നു. നിക്കോളാസ് കരേലിസിന്റെ ഇരട്ട ഗോളുകളാണ് മുംബൈക്ക് ജയമൊരുക്കിയത്. നഥാൻ ആഷർ റോഡ്രിഗ്സും ലാലിയൻസുവാല ചങ്‌തെയുമാണ് മുംബൈയുടെ മറ്റ് ഗോളുകൾ നേടിയത്.
ബ്ലാസ്റ്റേഴ്സിന് വേണ്ടി ജീസസ് ജിമെനെസും ക്വാമെ പെപ്രയുമാണ് ഗോൾ നേടിയത്. എന്നാൽ 72-ാം മിനിറ്റിൽ പെപ്ര ചുവപ്പ് കാർഡുമായി പുറത്തായത് ബ്ലാസ്റ്റേഴ്സിന് വലിയ തിരിച്ചടിയായി. അതേസമയം ഈ തോൽവിയോടെ പോയിന്റ് നിലയിൽ പത്താം സ്ഥാനത്തേക്ക് ബ്ലാസ്റ്റേഴ്‌സ് പിന്തള്ളി. ഇത്തവണ കളിക്കളത്തിൽ മികച്ച പ്രകടനം കാഴ്ചവെക്കാൻ മഞ്ഞപ്പടയ്ക്ക് കഴിഞ്ഞിട്ടില്ലെന്ന് തന്നെ പറയാം
