കോട്ടയം: കഞ്ചാവ് കേസുകളിൽ പ്രതിയായ യുവാവിനെ കരുതൽ തടങ്കലിൽ അടച്ചു. പാറമ്പുഴ തെക്കേതുണ്ടത്തിൽ വീട്ടിൽ റോബിൻ ജോർജിനെയാണ് (29) ഈസ്റ്റ്‌ പൊലീസ് അറസ്റ്റ് ചെയ്തത്. കുമാരനെല്ലൂരിൽ ഡോഗ് ഹോസ്റ്റലിൻറെ മറവിൽ കഞ്ചാവ് കച്ചവടം നടത്തിയിരുന്ന ഇയാൾ ഇത് അന്വേഷിക്കാൻ എത്തിയ പൊലീസ് ഉദ്യോഗസ്ഥരെ നായ്ക്കളെ അഴിച്ചുവിട്ട് ആക്രമിച്ചിരുന്നു. ഇയാളുടെ വീട്ടിൽനിന്നും 17.8 കിലോ കഞ്ചാവും പിടിച്ചെടുത്തിരുന്നു.
മണർകാട് സ്റ്റേഷനിലെ കഞ്ചാവ് കേസിലും ഇയാൾ പ്രതിയാണ്. ജില്ല പൊലീസ് മേധാവി ആയിട്ടുള്ള കെ. കാർത്തിക് സമർപ്പിച്ച റിപ്പോർട്ടിൻറെ അടിസ്ഥാനത്തിലാണ് ഇയാളെ കരുതൽതടങ്കലിൽ അടക്കാൻ സർക്കാർ അനുമതി നൽകിയത്. ഈസ്റ്റ്‌ എസ്.എച്ച്.ഒ യു. ശ്രീജിത്ത്‌, എസ്.ഐമാരായ സി.എസ്. നെൽസൺ, ജിജി ലൂക്കോസ്, സി.പി.ഒമാരായ പ്രതീഷ് രാജ്, അജിത്ത്, അജേഷ് ജോസഫ്, ജയേഷ് എന്നിവർ ചേർന്നാണ് ഇയാളെ അറസ്റ്റ് ചെയ്തത്. നിലവിൽ പ്രതിയെ പൂജപ്പുര സെൻട്രൽ ജയിലിൽ അടച്ചിരിക്കുകയാണ്.
