തിരുവനന്തപുരം: സംസ്ഥാന ന്യൂനപക്ഷ കമ്മിഷൻ വാട്‌സ് ആപ് വഴിയും ഇനി പരാതി സ്വീകരിക്കും. കേരളപ്പിറവി ദിനത്തിൽ കേരള ന്യൂനപക്ഷ ക്ഷേമ വകുപ്പ് ഡയറക്ടർ ഡോ. രേണുരാജ് വാട്സ്ആപ്പിലൂടെ ആദ്യ പരാതി സ്വീകരിച്ചു. 9746515133 എന്നതാണ് വാട്‌സ് ആപ് നമ്പർ. നിലവിൽ നേരിട്ടും ഇ-മെയിൽ, തപാൽ എന്നിവ മുഖേനയും പരാതി സ്വീകരിക്കുന്നുണ്ട്.
കമ്മീഷൻ ചെയർമാൻ അഡ്വ. എ.എ. റഷീദ് അധ്യക്ഷത വഹിച്ചു. അംഗങ്ങളായ എ. സൈഫുദ്ദീൻ ഹാജി, പി. റോസ, മെംബർ സെക്രട്ടറി നിസാർ എച്ച്, രജിസ്ട്രാർ ഗീത എസ് എന്നിവർ സംസാരിച്ചു. ന്യൂനപക്ഷ സംഘടന നേതാക്കൾ പങ്കെടുത്തു.
