ലോകമെമ്പാടുമുള്ള സിനിമാ പ്രേമികൾ ഏറെ ആരാധനയോടെ കണ്ട സിനിമയാണ് സംവിധായകൻ മണിരത്നത്തിന്റെ ക്ലാസിക് ചിത്രമായ ‘ദളപതി’. ഇപ്പോഴിതാ ചിത്രം റീ റിലീസിനൊരുങ്ങുകയാണ്. രജനിയുടെ പിറന്നാൾ ദിനമായ ഡിസംബർ 12 നാണ് തിയറ്ററുകളിൽ റീ റിലീസ് ചെയ്യുന്നത്. എസ്എസ്ഐ പ്രൊഡക്ഷൻസ് ആണ് ചിത്രം തമിഴ്നാട്ടിലും കർണാടകയിലും റിലീസ് ചെയ്യുന്നത്.
ഇന്നും തലമുറ വ്യത്യാസമില്ലാതെ പ്രേക്ഷകർ നെഞ്ചിലേറ്റുന്ന ചിത്രമാണ് ദളപതി. സൂര്യ എന്ന കഥാപാത്രമായി രജിനി തകർത്താടിയപ്പോൾ ദേവയായിട്ടാണ് മമ്മൂട്ടി പ്രേക്ഷകരുടെ മനംകവർന്നത്. അരവിന്ദ് സാമി, അമരീഷ് പുരി, ശോഭന, ശ്രീവിദ്യ, ഭാനുപ്രിയ, ഗീത, നാഗേഷ് എന്നിവരായിരുന്നു ചിത്രത്തിൽ മറ്റു പ്രധാന കഥാപാത്രങ്ങളെ അവതരിപ്പിച്ചത്. ചിത്രത്തിലെ ഇളയരാജ ഈണം നൽകിയ ഗാനങ്ങളെല്ലാം ഇന്നും ഹിറ്റാണ്. സന്തോഷ് ശിവൻ ആയിരുന്നു ചിത്രത്തിൻറെ ഛായാഗ്രഹണം നിർവഹിച്ചത്.
Also Read : ഓഡിയോ ലോഞ്ചുകളിൽ കാണുന്ന മുഖമല്ല ധനുഷിന്; തുറന്നടിച്ച് നയൻതാര
ഇത്തരത്തിൽ 2022 ൽ രജനിയുടെ പിറന്നാളിനോട് അനുബന്ധിച്ച് സുരേഷ് കൃഷ്ണ സംവിധാനം ചെയ്ത ‘ബാബാ’ റി റിലീസ് ചെയ്തിരുന്നു. അന്ന് മികച്ച പ്രതികരണമായിരുന്നു ചിത്രത്തിന് ലഭിച്ചത്. ‘ബാബ’യെ പോലെ വലിയ രീതിയിലുള്ള റിലീസ് ആണ് ‘ദളപതി’ക്കും ഇപ്പോൾ പദ്ധതിയിടുന്നത്. ലോകേഷ് കനകരാജിന്റെ ‘കൂലി’ എന്ന ചിത്രത്തിലാണ് രജനികാന്ത് ഇപ്പോൾ അഭിനയിക്കുന്നത്. ആക്ഷൻ ത്രില്ലർ ചിത്രം 2025 മെയിൽ തിയറ്ററുകളിലെത്തും. നാഗാർജുന അക്കിനേനി, ഉപേന്ദ്ര റാവു, സൗബിൻ ഷാഹിർ എന്നിവരും കൂലിയിൽ പ്രധാനവേഷത്തിലെത്തുന്നുണ്ട്.
