ദോഹ: ഖത്തർ ഊർജ കമ്പനിയായ ഖത്തർ എനർജിക്ക് 2022നെ അപേക്ഷിച്ച് ലാഭത്തിൽ 32 ശതമാനം ഇടിവ് രേഖപ്പെടുത്തി. 2023ൽ 2.33 ലക്ഷം കോടി രൂപയായിരുന്നു ലാഭം. റഷ്യയുടെ യുക്രെയ്ൻ അധിനിവേശത്തെതുടർന്ന് ആഗോള ദ്രവീകൃത പ്രകൃതി വാതക വിപണിയിൽ 2022 ൽ 60 ശതമാനത്തോളം വില ഉയർന്നിരുന്നു. 2022ൽ റഷ്യയിൽനിന്നുള്ള വാതകം ഉപേക്ഷിക്കാനുള്ള യൂറോപ്യൻ രാജ്യങ്ങളുടെ തീരുമാനത്തെതുടർന്ന് അമേരിക്കയിൽനിന്നും ഖത്തറിൽനിന്നുമാണ് യൂറോപ്പിലേക്ക് എൽ.എൻ.ജി എത്തിച്ചിരുന്നത്. പ്രതിസന്ധിക്ക് അയവുവരികയും എൽ.എൽ.ജി ഉൽപാദക രാജ്യങ്ങൾ ഉൽപാദനം കൂട്ടുകയും ചെയ്തതോടെ വില ഇടിഞ്ഞുതുടങ്ങി. ഇതാണ് ഖത്തർ എനർജിയുടെ ലാഭത്തിലും പ്രതിഫലിച്ചത്.
101.9 ബില്യൺ ഖത്തർ റിയാൽ, ഏതാണ്ട് 2.33 ലക്ഷം കോടി രൂപയാണ് കഴിഞ്ഞവർഷത്തെ വരുമാനം. ലോകത്തിന്റെ വർധിച്ച ദ്രവീകൃത പ്രകൃതി വാതക ആവശ്യത്തിനിടെ ഉൽപാദനം ഇരട്ടിയായി വർധിപ്പിക്കുമെന്ന് ഖത്തർ എനർജി പ്രഖ്യാപിച്ചിട്ടുണ്ട്. ലോകത്തെതന്നെ ഏറ്റവും വലിയ എൽ.എൻ.ജി നിക്ഷേപ മേഖലയായ നോർത്ത് ഫീൽഡ് മേഖലയിലെ ഉൽപാദനം വർധിപ്പിച്ച് 2030 ഓടെ പ്രതിവർഷം 142 ദശലക്ഷം ടൺ ആയി ഉയർത്തുമെന്നാണ് പ്രഖ്യാപനം.
നിലവിൽ പ്രതിവർഷം 77 ദശലക്ഷം ടൺ ആണ് ഖത്തറിന്റെ ഉൽപാദനം. ലോകത്തെ ഏറ്റവും വലിയ ദ്രവീകൃത പ്രകൃതി വാതക പദ്ധതിയായ നോർത്ത് ഫീൽഡ് പദ്ധതി പൂർത്തിയാകുന്നതോടെ 2027ൽ പ്രതിവർഷ ഉൽപാദനം 126 ദശലക്ഷം ടൺ ആയി വർധിക്കുമെന്ന് 2022ൽ പ്രഖ്യാപിച്ചിരുന്നു. ഇതിന്റെ തുടർച്ചയായി വെസ്റ്റ് ഫീൽഡിലേക്കുകൂടി പര്യവേക്ഷണം വിപുലീകരിച്ചതാണ് വരും വർഷങ്ങളിൽ ഉൽപാദനം ഉയരുമെന്ന പ്രഖ്യാപനത്തിന്റെ അടിസ്ഥാനം.
നിലവിൽ ലോകത്തെ ഏറ്റവും വലിയ രണ്ടാമത്തെ എൽ.എൻ.ജി ഉൽപാദകരായ ഖത്തർ, നോർത്ത് ഫീൽഡ് പദ്ധതി പൂർത്തിയായി, വിതരണം ആരംഭിക്കുന്നതോടെ 2029ൽ ലോകവിപണിയുടെ 40 ശതമാനം സ്വന്തമാക്കാൻ ഒരുങ്ങുകയാണ്. ആഗോള ദ്രവീകൃത, പ്രകൃതി വാതക വിപണിയുടെ 40 ശതമാനം ഇപ്പോൾ അമേരിക്കയും ഖത്തറുമാണ് കൈയടക്കിയിരിക്കുന്നത്.
2040ൽ ഈ രാജ്യങ്ങളുടെ വിപണി പങ്കാളിത്തം 60 ശതമാനമായി ഉയരുമെന്നാണ് വിലയിരുത്തൽ. ഖത്തർ സർക്കാറിന്റെ ഉടമസ്ഥതയിലുള്ള ഖത്തർ എനർജിയുടെ കീഴിലാണ് രാജ്യത്തെ എണ്ണ-പ്രകൃതി വാതക ഉൽപാദനമെല്ലാം. എണ്ണ പര്യവേക്ഷണവും ഉൽപാദനവും സംസ്കരണവും സംഭരണവും വിതരണവുമെല്ലാം നിയന്ത്രിക്കുന്നത് ഖത്തർ എനർജിക്ക് കീഴിലാണ്.
