തൃശൂർ: കോലാഴിയിൽ സിൽവർ വാറ്റുചാരായവും, ഒപ്പം വാറ്റുപകരണങ്ങളുമായി ഒരാൾ അറസ്റ്റിൽ. വീട് വാടകക്കെടുത്ത് ചാരായം വാറ്റി വിൽപ്പ നടത്തിയിരുന്ന തൃക്കൂർ സ്വദേശി ഷിജോൺ ആണ് അറസ്റ്റിലായത്. ഇയാളിൽ നിന്ന് മൂന്നര ലിറ്റർ ചാരായവും വാറ്റ് ഉപകരണങ്ങളും കണ്ടെടുത്തു. ഷിജോൺ വിയൂർ പോലിസ് സ്റ്റേഷനിൽ നിരവധി ക്രിമിനൽ കേസുകളിലെ പ്രതിയാണ്. അഞ്ച് വർഷക്കാലമായി ഇയാൾ പാടുക്കാട് ഭാഗത്ത് വാടകയ്ക്ക് വീടെടുത്ത് താമസിച്ച് വരുകയാണ്.
ഓണ വിപണി ലക്ഷ്യമിട്ട് പ്ലാൻ തയ്യാറാക്കി
നിലവിൽ ഓണ വിപണി ലക്ഷ്യമിട്ട് വൻ തോതിൽ ചാരായം വാറ്റാൻ പ്രതി പ്ലാൻ ചെയ്തിരുന്നു. എന്നാൽ ഇത് രഹസ്യമായി അറിഞ്ഞ തൃശൂർ കോലഴി എക്സൈസ് റേഞ്ച് ഇൻസ്പെക്ടർ കെ.വി നിധിനും സംഘവും തന്ത്രപരമായി ഇയാളെ വലയിലാക്കുകയായിരുന്നു. ഷിജോൺ വാറ്റുന്ന ചാരായത്തിന് മാർക്കറ്റിൽ വൻ ഡിമാന്റായിരുന്നു എന്നാണ് എക്സൈസ് പറയുന്നത്. അതേസമയം ശർക്കരക്ക് പകരം പനം കൽക്കണ്ടമാണ് പ്രതി ഉപയോഗിച്ചിരുന്നത്. കൽക്കണ്ടം ഉപയോഗിച്ച് വാറ്റുന്നതിനാൽ ഇത് സിൽവർ ചാരായമെന്നാണ് അറിയപ്പെടുന്നത്.
അസി. എക്സൈസ് ഇൻസ്പെക്ടർമാരായ കെ.എം. സജീവ്, ടി.ആർ സുനിൽകുമാർ, പ്രിവന്റീവ് ഓഫിസർമാരായ സുധീർകുമാർ, മീരാസാഹിബ്, രതീഷ് പി, സിവിൽ എക്സൈസ് ഓഫിസർ ശരത് കെ, വനിത സിവിൽ എക്സൈസ് ഓഫിസർ അമിത കെ എന്നിവരും ഉണ്ടായിരുന്നു.
