സിനിമയുമായി ബന്ധപ്പെട്ട അപ്‌ഡേറ്റുമായെത്തിരിക്കുകയാണ് നിര്‍മാതാക്കളായ കോക്കേഴ്‌സ് മീഡിയാ എന്റര്‍ടെയിന്‍മെന്റ്‌സ്.ദേവദൂതന്‍ സിനിമയിലെ ക്ലൈമാക്‌സ് സീനില്‍ പറന്നുയരുന്ന പ്രാവിനെ നോക്കുന്ന നായകന്റെ പോസ്റ്റര്‍ പങ്കുവെച്ച് ചിത്രം ഉടന്‍ എത്തുമെന്നാണ് അണിയറപ്രവര്‍ത്തകര്‍ അറിയിച്ചിരിക്കുന്നത്. പ്രധാന അണിയറപ്രവര്‍ത്തകരുടെ പേരുവിവരങ്ങള്‍ പോസ്റ്ററിലുണ്ടെങ്കിലും എന്നാണ് റിലീസെന്ന് വ്യക്തമായിട്ടില്ല. ചിത്രത്തിന്റെ ഡിജിറ്റല്‍ കളര്‍ കറക്ഷന്‍ ജോലി പൂര്‍ത്തിയായതായി നിര്‍മാതാക്കള്‍ നേരത്തേ അറിയിച്ചിരുന്നു. ദേവദൂതന്‍ റീമാസ്റ്റേര്‍ഡ് 4 കെ അറ്റ്‌മോസ് പതിപ്പ് തയ്യാറാകുന്നത്. നേരത്തെ സിനിമയുടെ പുതിയ പതിപ്പിന്റെ പണിപ്പുരയിലിരിക്കുന്ന ചിത്രം സിബി മലയില്‍ പങ്കുവെച്ചിരുന്നു.
2000 തില്‍ റിലീസ് ചെയ്ത മിസ്റ്ററി ത്രില്ലര്‍ ചിത്രമാണ് ദേവദൂതന്‍. രഘുനാഥ് പലേരിയുടെ തിരക്കഥയില്‍ ഒരുങ്ങിയ സിനിമയില്‍ വിശാല്‍ കൃഷ്ണമൂര്‍ത്തി എന്ന കഥാപാത്രത്തെയാണ് മോഹന്‍ലാല്‍ അവതരിപ്പിച്ചത്. ജയപ്രദ, വിനീത് കുമാര്‍, മുരളി, ജഗതി ശ്രീകുമാര്‍, ജഗദീഷ് തുടങ്ങിയവരാണ് സിനിമയിലെ മറ്റു പ്രധാന കഥാപാത്രങ്ങളെ അവതരിപ്പിച്ചത്. വിദ്യാസാഗര്‍ സംഗീതമൊരുക്കിയ സിനിമയിലെ ഗാനങ്ങള്‍ക്കെല്ലാം ഇന്നും വലിയ പ്രേക്ഷക സ്വീകാര്യതയുണ്ട്.
