ചെന്നൈ: തമിഴ് നടൻ ധനുഷിൻറെ ‘രായൻ’ ബോക്‌സ് ഓഫീസിൽ മികച്ച വിജയം നേടിയിരിക്കുകയാണ്. അതേസമയം ചിത്രം ഇറങ്ങി ഒരുമാസം കഴിയുന്നതോടെ ഒടിടി റിലീസ് തീയതി പ്രഖ്യാപിച്ചിരിക്കുകയാണ് അണിയറക്കാർ. നിലവിൽ ചിത്രത്തിൻറെ ഒഫീഷ്യൽ സ്ട്രീമിംഗ് അവകാശം പ്രൈം വീഡിയോയ്ക്കാണ് ലഭിച്ചിരിക്കുന്നത്.
നടൻ ധനുഷ് തന്നെ സംവിധാനം ചെയ്യുകയും രചന നിർവഹിക്കുകയും ചെയ്ത ‘രായൻ’ തിയേറ്ററിൽ റിലീസ് ചെയ്ത് നാലാഴ്ചയ്ക്ക് ശേഷം ഓഗസ്റ്റ് 23-ന് പ്രൈം വീഡിയോയിൽ റിലീസ് ചെയ്യും എന്നാണ് പ്രൈം വീഡിയോ ഔദ്യോഗികമായി ഇപ്പോൾ അറിയിച്ചിരിക്കുന്നത്. ജൂലൈ 26നാണ് ചിത്രം തീയറ്ററിൽ എത്തിയത്.
ധനുഷ് സംവിധാനത്തിൽ പിറന്ന ചിത്രം ആഗോള ബോക്സോഫീസിൽ ഇതിനകം 150 കോടി നേടിയിട്ടുണ്ട്. ഇന്ത്യൻ ബോക്സോഫീസിൽ ചിത്രം 80 കോടിക്ക് മുകളിലാണ് നേടിയത്. കോളിവുഡിലെ ഈ വർഷത്തെ ഇതുവരെയുള്ള വലിയ വിജയങ്ങളിൽ ഒന്നാണ് ചിത്രം.
ചിത്രത്തിൽ ധനുഷ് രായൻ എന്ന ടൈറ്റിൽ കഥാപാത്രത്തെയാണ് അവതരിപ്പിക്കുന്നത്. ഒരു ഫാമിലി ക്രൈം ത്രില്ലർ ചിത്രമാണ് രായൻ. ഛായാഗ്രാഹണം ഓം പ്രകാശാണ്. ധനുഷ് നായകനായ രായന്റെ സംഗീത സംവിധാനം എ ആർ റഹ്‍മാനാണ് നിർവഹിച്ചിരിക്കുന്നത്. മലയാളത്തിൽ നിന്ന് അപർണ ബലമുരളിക്ക് പുറമേ ചിത്രത്തിൽ കാളിദാസ് ജയറാം എന്നിവരും എത്തുമ്പോൾ ധനുഷ് സംവിധായകനായ രായനിൽ മറ്റ് പ്രധാന താരങ്ങൾ സുന്ദീപ് കിഷൻ, വരലക്ഷ്‍മി ശരത്‍കുമാർ, ദുഷ്‍റ വിജയൻ. എസ് ജെ സൂര്യ, പ്രകാശ് രാജ്, സെൽവരാഘവൻ എന്നിവരാണ്.
അതേസമയം രായനിലെ ധനുഷ് അവതരിപ്പിക്കുന്ന നായക കഥാപാത്രം ഒരു ഫാസ്റ്റ്ഫുഡ് കട നടത്തുന്ന വ്യക്തിയാണ്. എന്നാൽ തന്റെ കുടുംബത്തിന് വേണ്ടി അപ്രതീക്ഷിതമായ അധോലോകവുമായി ഏറ്റുമുട്ടേണ്ടിവരുന്നു ഇയാൾക്ക്. എസ് ജെ സൂര്യയാണ് ധനുഷിന്റെ ചിത്രത്തിൽ പ്രതിനായകനായി എത്തുന്നത് എന്നതും ചിത്രത്തിന്റെ പ്രധാന ആകർഷണമാണ്.
