അർജുൻ റെഡ്ഡി എന്ന ചിത്രത്തിലൂടെ സിനിമയിൽ എത്തിയ സന്ദീപ് റെഡ്ഡി വംഗ ബോളിവുഡിലെ മികച്ച സംവിധായകരിൽ ഒരാളാണ്. രൺബീർ കപൂറിനെ നായകനാക്കി ഒരുക്കിയ അനിമൽ എന്ന ചിത്രം വൻ വിജയം നേടിയിരുന്നു. ഐഐഎഫ്എ 2024 ൽ പങ്കെടുത്ത് സംസാരിക്കുകയായിരുന്ന സന്ദീപ് ഇപ്പോൾ തനിക്ക് പ്രവർത്തിക്കാൻ ആഗ്രഹമുള്ള നടനെ കുറിച്ച് തുറന്നു പറഞ്ഞിരിക്കുകയാണ്. ഭാവിയിൽ ബോളിവുഡ് കിംഗ് ഷാരുഖ് ഖാനൊപ്പം പ്രവർത്തിക്കാൻ ആഗ്രഹമുണ്ടെന്നാണ് സന്ദീപ് പറഞ്ഞത്.
ഷാരൂഖിന്റെ അഭിനയം യഥാർത്ഥമാണെന്നും മറ്റ് താരങ്ങളെ അപേക്ഷിച്ച് ഷാരൂഖിനെ സ്‌പെഷ്യലാക്കുന്നത് അദ്ദേഹത്തിന്റെ പ്രകടനമാണെന്നും സന്ദീപ് പറഞ്ഞു.’അദ്ദേഹം ഒരു മികച്ച പെർഫോമറാണ്, സാധാരണ ഞങ്ങൾ ‘പെർഫോമർ’ എന്ന വാക്ക് ലാഘവത്തോടെയാണ് ഉപയോഗിക്കുന്നത്, പക്ഷേ അദ്ദേഹം മികച്ച പ്രകടനം നടത്തുന്നവരിൽ ഒരാളാണ്, ഭാവിയിൽ തീർച്ചയായും അദ്ദേഹവുമായി ഒരുമിച്ച് പ്രവർത്തിക്കും’ എന്നുമായിരുന്നു സന്ദീപിന്റെ പ്രതികരണം.
Also Read: പുത്തൻ അപ്‌ഡേറ്റുകളുമായി ‘ദളപതി 69’
അതേസമയം സന്ദീപിനൊപ്പം പ്രവർത്തിക്കാൻ തനിക്കും താൽപ്പര്യമുണ്ടെന്ന് ഷാരൂഖ് വ്യക്തമാക്കി. ബോളിവുഡിൽ ഹിറ്റായ അനിമലിന്റെ രണ്ടാം ഭാഗത്തിന് ഒരുങ്ങുകയാണ് സന്ദീപ് ഇപ്പോൾ. അനിമൽ പാർക്ക് എന്ന് പേരിട്ടിരിക്കുന്ന ചിത്രത്തിന്റെ ചിത്രീകരണത്തിന് ശേഷം പ്രഭാസ് നായകനാവുന്ന പുതിയ ചിത്രം ‘സ്പിരിറ്റ്’ എന്ന ചിത്രവും സന്ദീപിന്റെതായി അണിയറയിൽ ഒരുങ്ങുന്നുണ്ട്. പത്താൻ 2 ആണ് ഷാരൂഖിന്റേതായി അണിയറയിൽ ഒരുങ്ങുന്നത്.
