പാലക്കാട്: സന്ദീപ് വാര്യർ ബി.ജെ.പി വിടുകയാണെന്ന വാർത്തയിൽ പ്രതികരിച്ച് കെ. സുരേന്ദ്രൻ. മുങ്ങിക്കൊണ്ടിരിക്കുന്ന കപ്പലിലേക്ക് ആരെങ്കിലും പോകുമോ എന്നാണ് സുരേന്ദ്രൻ ചോദിച്ചത്. സിപിഎമ്മും കോൺഗ്രസും മുങ്ങുന്ന കപ്പലാണെന്ന് സുരേന്ദ്രൻ പരിഹസിച്ചു. സന്ദീപ് വാര്യർ എവിടെ വരെ പോകുമെന്ന് നോക്കട്ടെയെന്നും സുരേന്ദ്രൻ പറഞ്ഞു.
തിരഞ്ഞെടുപ്പ് സമയത്തല്ല ഇത്തരം പരാതികൾ പറയേണ്ടതെന്ന് സുരേന്ദ്രൻ കുറ്റപ്പെടുത്തി. മാധ്യമ ശ്രദ്ധയും വീരപരിവേഷവുമൊക്കെ എത്ര ദിവസമുണ്ടാകുമെന്നും അദ്ദേഹം ചോദിച്ചു. തിരഞ്ഞെടുപ്പ് കാലത്ത് പാലിക്കേണ്ട മര്യാദ ഫേസ്ബുക്ക് പോസ്റ്റിൽ കാണിച്ചിട്ടുണ്ടോയെന്ന് പരിശോധിക്കുമെന്നും സുരേന്ദ്രൻ വ്യക്തമാക്കി.
Also Read: സന്ദീപ് വാര്യരെ സ്വാഗതം ചെയ്ത് സിപിഎം
പാർട്ടി ഒരുകാലത്തും സന്ദീപിനെ അവഗണിച്ചിട്ടില്ല. താൻ വയനാട്ടിൽ മത്സരിച്ചപ്പോൾ തെരഞ്ഞെടുപ്പിന്റെ എല്ലാ ചുമതലയും ഏൽപ്പിച്ചത് സന്ദീപിനെയായിരുന്നു. പ്രധാനപ്പെട്ട ചാനലുകളിലെല്ലാം സന്ദീപിനെയാണ് ചർച്ചക്ക് അയച്ചതെന്നും സുരേന്ദ്രൻ പറഞ്ഞു.
