വാഷിംഗ്ടണ്‍: നിയുക്ത അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് വൈറ്റ് ഹൗസില്‍ എത്തി. ജോ ബൈഡനുമായി ട്രംപ് കൂടിക്കാഴ്ച നടത്തി. ഹസ്തദാനം ചെയ്താണ് ബൈഡന്‍ ട്രംപിനെ സ്വീകരിച്ചത്. 2020-ല്‍ നടന്ന അമേരിക്കന്‍ പ്രസിഡന്റ് തെരഞ്ഞെടുപ്പിന് ശേഷം ഡൊണാള്‍ഡ് ട്രംപും ജോ ബൈഡനും ഇതാദ്യമായാണ് കൂടിക്കാഴ്ച നടത്തുന്നത്.
Also Read: തെക്കന്‍ ലെബനനില്‍ വ്യോമാക്രമണം; നിരവധി ഉന്നത ഫീല്‍ഡ് കമാന്‍ഡര്‍മാരെ വധിച്ചെന്ന് ഇസ്രയേല്‍
വൈറ്റ് ഹൗസിലെ കൂടിക്കാഴ്ചയ്ക്ക് അല്‍പ്പം വൈകിയാണ് എത്തിയതെങ്കിലും പ്രസിഡന്റ് തെരഞ്ഞെടുപ്പില്‍ വിജയിച്ച ഡൊണാള്‍ഡ് ട്രംപിനെ ജോ ബൈഡന്‍ അഭിനന്ദിച്ചു. സുഗമവും സമാധാനപരവുമായ അധികാര കൈമാറ്റം ഉറപ്പാക്കുമെന്ന് ട്രംപിന് ബൈഡന്‍ ഉറപ്പ് നല്‍കി. ട്രംപിന് ആവശ്യമായതെല്ലാം ഉറപ്പാക്കാന്‍ തന്നാല്‍ കഴിയുന്നതെല്ലാം ചെയ്യുമെന്നും ബൈഡന്‍ പറഞ്ഞു. കാര്യങ്ങളെല്ലാം സുഗമമായി തന്നെ നടക്കുമെന്നാണ് പ്രതീക്ഷയെന്ന് ട്രംപും മറുപടിയായി പറഞ്ഞു. പ്രഥമ വനിതയായ ജില്‍ ബൈഡനും ട്രംപിന്റെ വിജയത്തെ അഭിനന്ദിച്ചു.
