പ്രതിപക്ഷ നേതാക്കളുടെ പ്രസംഗത്തില്‍ നിന്നും മുസ്‌ലിം, കാടൻ നിയമം, വർഗീയ സ്വേച്ഛാധിപത്യ ഭരണം അടക്കമുള്ള വാക്കുകള്‍ സെന്‍സര്‍ ചെയ്ത് ദൂരദര്‍ശനും ഓള്‍ ഇന്ത്യ റേഡിയോയും. ലോക്‌സഭാ തെരഞ്ഞെടുപ്പിന് മുന്നോടിയായി അനുവദിച്ച പ്രസംഗത്തില്‍ നിന്നുമാണ് ഈ പദങ്ങള്‍ ഉപയോഗിക്കരുതെന്ന് നിര്‍ദേശിച്ചത്. സി.പി.എം നേതാവ് സീതാറാം യെച്ചൂരി, ഫോര്‍വാര്‍ഡ് ബ്ലോക്ക് നേതാവ് ജി. ദേവരാജന്‍ എന്നീ രണ്ട് പ്രതിപക്ഷ നേതാക്കളോടാണ് പ്രസംഗത്തില്‍ നിന്നും മേല്‍പ്പറഞ്ഞ വാക്കുകള്‍ ഒഴിവാക്കാന്‍ നിര്‍ദേശിച്ചത്.
തുടര്‍ന്ന് സീതാറാം യെച്ചൂരി തൻ്റെ പ്രസംഗത്തില്‍ നിന്ന് രണ്ട് പദങ്ങളും ഒഴിവാക്കുകയും ഭരണത്തിലെ പാപ്പരത്തം എന്നതിന് പകരം പരാജയം എന്ന വാക്ക് ഉപയോഗിക്കുകയും ചെയ്തു. ഡല്‍ഹിയിലെ ദൂരദര്‍ശന്‍ സ്റ്റുഡിയോയില്‍ നടത്തിയ പ്രസംഗത്തില്‍ നിന്നുമാണ് പ്രസംഗത്തില്‍ മാറ്റം വരുത്താന്‍ യെച്ചൂരിയോട് ആവശ്യപ്പെട്ടത്. അതേസമയം കൊല്‍ക്കത്തയിലെ സ്റ്റുഡിയോയിലെ പ്രസംഗത്തില്‍ നിന്നുമാണ് ജി. ദേവരാജനോട് മുസ്‌ലിങ്ങള്‍ എന്ന വാക്ക് നീക്കം ചെയ്യാന്‍ ആവശ്യപ്പെട്ടത്.
തെരഞ്ഞെടുപ്പ് കമ്മീഷൻ്റെ പെരുമാറ്റ ചട്ടം പാലിക്കുകയാണ് ദൂരദര്‍ശനും ഓള്‍ ഇന്ത്യ റേഡിയോയും ചെയ്തതെന്ന് പ്രസാര്‍ ഭാരതിയിലെ ഉദ്യോഗസ്ഥന്‍ ദി ഇന്ത്യന്‍ എക്‌സ്പ്രസിനോട് പറഞ്ഞു. ഒരുപാട് നേതാക്കളുടെ കാര്യത്തില്‍ ഇത് സംഭവിച്ചിട്ടുണ്ടെന്നും മുഖ്യമന്ത്രിമാരുടെ പ്രസംഗം പോലും തിരുത്തിയ സംഭവമുണ്ടായിട്ടുണ്ടെന്നും ഉദ്യോഗസ്ഥന്‍ കൂട്ടിച്ചേര്‍ത്തു.
മറ്റ് രാജ്യങ്ങളെക്കുറിച്ചുള്ള വിമർശനം, മതങ്ങള്‍ക്കോ സമുദായങ്ങള്‍ക്കോ എതിരെയുള്ള ആക്രമണം, ആക്രമണത്തിന് പ്രേരണ നല്‍കൽ, കോടതിയലക്ഷ്യത്തിന് തുല്യമായ കാര്യങ്ങള്‍ പറയുക, രാഷ്ട്രപതിയുടെയും നീതിന്യായവ്യവസ്ഥയുടെയും സത്യസന്ധതയെ അധിക്ഷേപിക്കുക, പേരിനെ മുന്‍നിര്‍ത്തി വിമര്‍ശിക്കുക, ഐക്യവും രാജ്യത്തിൻ്റെ പരമാധികാരവും അഖണ്ഡതയെയും ബാധിക്കുന്ന പരാമര്‍ശങ്ങള്‍, അശ്ലീലവും അപകീര്‍ത്തിപരവുമായ പരാമര്‍ശങ്ങള്‍ തുടങ്ങിയവയിൽ നിന്നും വിട്ടുനില്‍ക്കണമെന്നാണ് മാര്‍ഗ നിര്‍ദേശത്തില്‍ പരാമര്‍ശിക്കുന്നത്.
തെരഞ്ഞെടുപ്പ് കമ്മീഷന്‍ ഏപ്രിലില്‍ പുറപ്പെടുവിച്ച ഉത്തരവുകള്‍ പ്രകാരം ദേശീയ പാര്‍ട്ടിയുടെയും സംസ്ഥാന പാര്‍ട്ടികളുടെയും പ്രതിനിധികള്‍ക്ക് തെരഞ്ഞെടുപ്പ് പ്രചരണത്തിനായി ദൂരദര്‍ശനിലും ഓള്‍ ഇന്ത്യ റേഡിയോയിലും സമയം അനുവദിച്ചിരുന്നു. 1968ലെ തെരഞ്ഞെടുപ്പ് ചിഹ്നങ്ങളിലെ ഉത്തരവ് പ്രകാരം ആറ് ദേശീയ പാര്‍ട്ടികള്‍ക്കും 59 സംസ്ഥാന പാര്‍ട്ടികള്‍ക്കും ടെലികാസ്റ്റ് ചെയ്യാനും ബ്രോഡ്കാസ്റ്റ് ചെയ്യാനുമുള്ള അനുമതിയുണ്ടെന്നാണ് ഉത്തരവ് പറയുന്നത്.
അതേസമയം ഇംഗ്ലീഷിലുള്ള തൻ്റെ പ്രസംഗത്തിൻ്റെ ഹിന്ദി ഭാഗത്ത് ഒരു തെറ്റും അവര്‍ കണ്ടെത്തിയില്ലെന്ന് യെച്ചൂരി പ്രതികരിച്ചു. എന്നാല്‍ പ്രതിഷേധത്തെ തുടര്‍ന്ന് അവരുടെ അഭിപ്രായം പ്രകാരം ഇംഗ്ലീഷ് പതിപ്പ് പരിഷ്‌കരിക്കേണ്ടി വന്നെന്നും യെച്ചൂരി വ്യക്തമാക്കി. ഇലക്ടറല്‍ ബോണ്ടിനെക്കുറിച്ചുള്ള പരാമര്‍ശങ്ങളും നീക്കം ചെയ്യാന്‍ യെച്ചൂരിയോട് ആവശ്യപ്പെട്ടിട്ടുണ്ട്.
‘ദൂരദര്‍ശനിലെ എൻ്റെ പ്രസംഗം സെന്‍സര്‍ ചെയ്തത് ജനാധിപത്യത്തിലെ വിയോജിക്കാനുള്ള അവകാശം നിഷേധിക്കലാണ്. വര്‍ഗീയ ഭരണം, കാടന്‍ നിയമങ്ങള്‍ തുടങ്ങിയ പദങ്ങള്‍ ഒഴിവാക്കാന്‍ നിര്‍ദേശം നല്‍കുകയായിരുന്നു. ഒരു പാര്‍ലമെൻ്ററി ജനാധിപത്യത്തില്‍ ഭരണത്തിൻ്റെ സ്വഭാവത്തെ കുറിച്ചുള്ള അഭിപ്രായം പ്രകടിപ്പിക്കാന്‍ ഏതൊരു പാര്‍ട്ടിക്കും അവകാശമുണ്ട്. ഭരണത്തിലെ പാപ്പരത്തം എന്ന പ്രയോഗത്തിന് പകരം പരാജയം എന്ന് പ്രയോഗിക്കാന്‍ ആവശ്യപ്പെട്ടത് ഭരണത്തിലെ സ്വേച്ഛാധിപത്യത്തിൻ്റെ സാക്ഷ്യപ്പെടുത്തലാണ്,” ദൂരദര്‍ശൻ്റെ ഡയരക്ടര്‍ ജനറലിന് അയച്ച കത്തില്‍ യെച്ചൂരി പറയുന്നു. പ്രയോഗങ്ങള്‍ നീക്കം ചെയ്തത് പുനഃപരിശോധിക്കണമെന്നും യെച്ചൂരി കത്തില്‍ ആവശ്യപ്പെട്ടു.
പൗരത്വ ഭേദഗതി നിയമത്തിലെ വിവേചനപരമായ വകുപ്പുകളാണ് തൻ്റെ പ്രസംഗത്തിലുണ്ടായിരുന്നതെന്ന് ദേവരാജന്‍ പറയുന്നു. ”മുസ്‌ലിം എന്ന വാക്ക് നീക്കം ചെയ്യാന്‍ അവര്‍ എന്നോട് ആവശ്യപ്പെട്ടു. പൗരത്വത്തിന് അര്‍ഹതയുള്ള മറ്റ് ന്യൂനപക്ഷങ്ങളെ നിയമത്തില്‍ പരാമര്‍ശിക്കുന്നതിനാല്‍ മുസ്‌ലിങ്ങളോടു കാണിക്കുന്ന വിവേചനം എനിക്ക് ഊന്നിപ്പറയണമെന്ന് ആവശ്യപ്പെട്ടു. എന്നാല്‍ അവര്‍ അനുവദിച്ചില്ല ‘ ദേവരാജന്‍ പറഞ്ഞു.
”പൗരത്വ ഭേദഗതി നിയമവും ദേശീയ പൗരത്വ രജിസ്റ്ററും പോലുള്ള നയങ്ങള്‍ മുസ്ലിങ്ങളോടുള്ള വിവേചനപരമായ സമീപനമാണ്, അത് രാജ്യത്തിൻ്റെ മതേതരഘടനയെ ദുര്‍ബലപ്പെടുത്തും,” എന്നായിരുന്നു ദേവരാജൻ്റെ പ്രസംഗത്തിൻ്റെ യഥാര്‍ഥ രൂപം. എന്നാല്‍ പിന്നീട് മുസ്‌ലിങ്ങള്‍ക്ക് പകരം പ്രത്യേക സമുദായം എന്ന് ഉപയോഗിക്കേണ്ടതായി വന്നുവെന്ന് അദ്ദേഹം വ്യക്തമാക്കി.
