മനാമ: സ്വകാര്യ മേഖലയിലെ ജീവനക്കാരുടെ അധികസമയ വേതനം ഇരട്ടിയാക്കണമെന്ന നിർദേശവുമായി എം.പി. നിലവിൽ പകൽ അധികസമയ നിരക്ക് 25 ശതമാനവും രാത്രിയിൽ 50 ശതമാനവുമാണ്. ജലാൽ കാദെം എം.പിയുടെ നിർദേശമനുസരിച്ച് ഇത് പകൽ 50 ശതമാനവും രാത്രി ഇരട്ടി വേതനവുമാക്കണമെന്നാണ് പറയുന്നത്.
ജോലി സമയത്തിന് പുറത്ത് പൂർത്തിയാക്കിയ ജോലികൾക്കും, ഔദ്യോഗിക അവധി ദിവസങ്ങളിൽ ജോലി ചെയ്യുന്നതിനും ഇത് ബാധകമാക്കണം. തൊഴിലാളികളുടെ അവകാശങ്ങൾ മെച്ചപ്പെടുത്തുന്നതിനും ന്യായമായ നഷ്ടപരിഹാരം ഉറപ്പാക്കുന്നതിനുമുള്ള രാജ്യത്തിന്റെ പ്രതിബദ്ധതയുടെ ഭാഗമായി പുതിയ നിർദേശം പരിഗണിക്കപ്പെടുമെന്നും എം.പി ചൂണ്ടിക്കാട്ടുന്നു.
ALSO READ: എം എ യൂസഫലിയെ പ്രശംസിച്ച് പീയുഷ് ഗോയൽ
തൊഴിലാളി യൂനിയനുകൾ, ജീവനക്കാർ, അഭിഭാഷക ഗ്രൂപ്പുകൾ എന്നിവ ഇക്കാര്യങ്ങൾ ആവശ്യപ്പെടുന്നതായും അദ്ദേഹം പറഞ്ഞു. വേതനം വർധിപ്പിക്കുന്നത് കൂടുതൽ ഔട്ട്പുട്ടുണ്ടാകാൻ സഹായകമാകും.
വർധിച്ചു വരുന്ന ജീവിത ചെലവുകളുടെ സാഹചര്യത്തിൽ ഇങ്ങനെയൊരു തീരുമാനം അത്യന്താപേക്ഷിതമാണ് .തൊഴിലാളികൾക്ക് ഇത് പ്രോത്സാഹനമാകുകയും ചെയ്യും. ഈ നിർദേശം ലെജിസ്ലേറ്റിവ് ആൻഡ് ലീഗൽ അഫയേഴ്സ് കമ്മിറ്റിയുടെ പരിഗണനയിലാണ് ഇപ്പോൾ. അതിനുശേഷം സർക്കാറിന്റെ പരിഗണനക്ക് വിടും.
