പല കാരണങ്ങൾ കൊണ്ടും പെട്രോൾ, ഡീസൽ വാഹനങ്ങൾക്ക് മൈലേജ് കുറയാനുള്ള സാധ്യതയുണ്ട്. ചിലപ്പോൾ നമ്മൾ അറിഞ്ഞോ അറിയാതോയോ വരുത്തുന്ന തെറ്റുകളായിരിക്കും ഈ മൈലേജ് കുറവിനുള്ള ചില പ്രധാന കാരണങ്ങൾ. ചിലപ്പോൾ ഈ തെറ്റുകൾ വളരെ ചെറുതായിരിക്കാം, അവ തിരുത്തിയാൽ നമ്മുടെ കാറിനും മറ്റുള്ളവരെ പോലെ നല്ല മൈലേജ് നൽകാൻ കഴിയും. മൈലേജ് കൂട്ടാൻ കാറിൻ്റെ എസി ഓഫ് ചെയ്യുന്നതിനെക്കുറിച്ചോ വിൻഡോ തുറന്നിട്ട് ഡ്രൈവ് ചെയ്യുന്നതിനെക്കുറിച്ചോ അല്ല ഇവിടെ പറയുന്നത്. പകരം, നമ്മുടെ വാഹനത്തിൻ്റെ മൈലേജ് വർദ്ധിപ്പിക്കാൻ കഴിയുന്ന മറ്റു ചില വിവരങ്ങൾ നോക്കിയാലോ..
ടയർ മർദ്ദം
കാറിലേ ടയറുകളിലെ വായു മർദ്ദം ശരിയല്ലെങ്കിൽ വാഹനം ഓടിക്കാൻ കൂടുതൽ ഊർജം വേണ്ടിവരുന്നു. ഇത് ഇന്ധന ഉപഭോഗം വർദ്ധിപ്പിക്കുന്നു. ടയർ മർദ്ദം കൃത്യമായി നിലനിർത്തുന്നത് മൈലേജ് മെച്ചപ്പെടുത്തും.
എഞ്ചിൻ പരിപാലനം
കാറിന്റെ എഞ്ചിൻ സ്ഥിരമായി പരിപാലിക്കാത്തത് അതിൻ്റെ കാര്യക്ഷമത കുറയ്ക്കും. ഓയിൽ മാറ്റുന്നതും എയർ ഫിൽട്ടറും സ്പാർക്ക് പ്ലഗും ഇടയ്ക്കിടെ പരിശോധിക്കുന്നതും പ്രധാനമാണ്. അതുവഴി കാറിന്റെ എഞ്ചിൻ നന്നായി പ്രവർത്തിക്കാനും മൈലേജ് മികച്ചതാക്കാനും കഴിയും.
അമിതഭാരം
നമ്മുടെ വാഹനത്തിൽ അമിതഭാരം ചേർക്കുന്നത് എൻജിനിൽ സമ്മർദ്ദം വർദ്ധിപ്പിക്കുന്നു, ഇത് ഇന്ധന ഉപഭോഗം വർദ്ധിപ്പിക്കുന്നു. നിങ്ങളുടെ കാറിൽ നിന്ന് അനാവശ്യ ഇനങ്ങൾ നീക്കം ചെയ്തുകൊണ്ട് ഭാരം കുറയ്ക്കുക. നമ്മളിൽ പലരും യാത്രയ്ക്കിടെ അമിത ലഗേജുകൾ കൊണ്ടുപോകുന്നത് വാഹനത്തിൻ്റെ മൈലേജിനെ ബാധിക്കുന്നതായി പലതവണ കണ്ടിട്ടുണ്ട്.
മോശം ഡ്രൈവിംഗ് ശീലങ്ങൾ
യാത്രചെയ്യുമ്പോൾ ഇടയ്ക്കിടെയുള്ള ബ്രേക്കിംഗ്, വേഗത്തിലുള്ള ഡ്രൈവിംഗ്, പെട്ടെന്നുള്ള ആക്സിലറേഷൻ എന്നിവ ഇന്ധന ഉപഭോഗം വർദ്ധിപ്പിക്കുന്നു. സുഗമവും സ്ഥിരവുമായ ഡ്രൈവിംഗ് വഴി മൈലേജ് മെച്ചപ്പെടുത്താം. അതേസമയം ഇതിനായി കാറിൻ്റെ എസി ഓഫ് ചെയ്യേണ്ടതില്ല.
എസിയുടെ അമിത ഉപയോഗം
എയർകണ്ടീഷണറിൻ്റെ അമിതമായ ഉപയോഗം നമ്മുടെ കാറിന്റെ എഞ്ചിനിൽ സമ്മർദ്ദം ചെലുത്തുന്നു, ഇത് മൈലേജ് കുറയ്ക്കും. ആവശ്യാനുസരണം എസി ഉപയോഗിക്കുക.
ഈ കാര്യങ്ങൾ ശ്രദ്ധിച്ചാൽ നമുക്ക് വാഹനത്തിൻ്റെ മൈലേജ് കൂട്ടാനും, അതുവഴി ഇന്ധന ഉപഭോഗം കുറയ്ക്കാനും സാധിക്കും.
