റിയാദ്: കാർബൺ സാങ്കേതികവിദ്യകളിലെ സൗദിയുടെ മികവിനെ പ്രശംസിച്ച് ഊർജ മന്ത്രി അമീർ അബ്ദുൽ അസീസ് ബിൻ സൽമാൻ. സാമ്പത്തിക വളർച്ച, ഊർജ സുരക്ഷ, കാലാവസ്ഥ വ്യതിയാനത്തെ ചെറുക്കാനുള്ള ശ്രമങ്ങൾ എന്നിവയുടെ സന്തുലിതാവസ്ഥക്ക് പ്രാധാന്യമുണ്ടെന്നും ഊർജ മന്ത്രി പറഞ്ഞു. ജി20 രാജ്യങ്ങളുടെ ഊർജ ഗ്രൂപ്പിന്റെ യോഗത്തിലാണ് ഇക്കാര്യം പറഞ്ഞത്.
ഈ വർഷാവസാനത്തോടെ പുനരുപയോഗ ഊർജത്തിൽനിന്ന് വൈദ്യുതി ഉൽപാദിപ്പിക്കുന്നതിനുള്ള ശേഷി 44 ജിഗാവാട്ടിലെത്തിക്കാനുള്ള സൗദിയുടെ ശ്രമങ്ങൾ അദ്ദേഹം സൂചിപ്പിച്ചു. സീറോ കാർബൺ സമ്പദ്‌വ്യവസ്ഥയുടെ സാങ്കേതികവിദ്യകൾ ഉപയോഗിക്കുന്നതിൽ ഒരു മാതൃകയാകാനും ശുദ്ധമായ ഊർജത്തിന്റെ ഉൽപാദനത്തിലും കയറ്റുമതിയിലും ആഗോള നേതാവാകാനുമുള്ള സൗദിയുടെ ആഗ്രഹത്തെ പറ്റിയും അദ്ദേഹം പറഞ്ഞു.
Also Read: റിയാദ് അന്താരാഷ്ട്ര ആരോഗ്യ ഫോറം ഒക്‌ടോബർ 21 മുതൽ 23 വരെ
ജി20 പ്രവർത്തനങ്ങൾക്കുള്ളിൽ സുസ്ഥിര ഊർജത്തിലേക്കും ന്യായമായ ഊർജ സംക്രമണത്തിലേക്കും മാറുന്നതിനുള്ള നയങ്ങൾ ഒക്‌ടോബർ മൂന്നും നാലും തീയതികളിൽ ബ്രസീലിലെ ഫോസ് ഡോ ഇഗ്വാസു നഗരത്തിൽ നടന്ന ജി20 ഊർജ ഗ്രൂപ് യോഗത്തിൽ ചർച്ച നടത്തി. റാസൽഖൈർ ഇൻഡസ്ട്രിയൽ സിറ്റിയിൽ ഹൈഡ്രജൻ ഉൽപാദന കേന്ദ്രവും 2027ഓടെ പ്രതിവർഷം ഒമ്പത് ദശലക്ഷം ടൺ ശേഷി കൈവരിക്കുന്ന ഒരു വലിയ കാർബൺ ക്യാപ്‌ചർ ആൻഡ് സ്റ്റോറേജ് പ്രോജക്റ്റും സ്ഥാപിക്കുന്നതിനെ കുറിച്ച് ഊർജ മന്ത്രി സൂചിപ്പിച്ചു.
