അബുദാബി: സൗദി അറേബ്യ, യുഎഇ ഉള്‍പ്പെടെയുള്ള ഗള്‍ഫ് രാജ്യങ്ങളില്‍ 93 ദിവസത്തോളം നീണ്ടുനിന്ന ചൂടുകാലത്തിന് പരിസമാപ്തി. ഇന്നു മുതല്‍ ശരത് കാലത്തിന് തുടക്കം കുറിക്കുമെന്ന് ബന്ധപ്പെട്ട ഔദ്യോഗിക വൃത്തങ്ങള്‍ അറിയിച്ചു.
ചൂട് കുറയുന്നതോടെ അന്തരീക്ഷ താപനില കുറയുകയും രാത്രിയും പകലും ഒരുപോലെ ദൈര്‍ഘ്യം ഉള്ളതായി മാറുകയും ചെയ്‌തേക്കും. തുടര്‍ന്ന് രാത്രിയുടെ ദൈര്‍ഘ്യം വര്‍ധിച്ച് തുടങ്ങും. അതേസമയം താപനില പതിയെ 25 ഡിഗ്രി സെല്‍ഷ്യസിലേക്ക് താഴും. തുടര്‍ന്ന് നവംബര്‍ മാസത്തോടെ ശീതകാലത്തിന് തുടക്കം കുറിക്കും.
Also Read: ബഹ്‌റൈൻ ടൂറിസം, ബിസിനസ് മേഖലകളില്‍ ഉണര്‍വ്
നവംബര്‍ മുതല്‍ മാര്‍ച്ച് വരെ മഴക്കാലം തുടര്‍ന്ന് ഈ കാലയളവില്‍ വര്‍ഷത്തിലെ 22 ശതമാനം മഴ ലഭിക്കുമെന്നാണ് പ്രതീക്ഷിക്കുന്നത്. കൂടാതെ ഈ മാസം തന്നെ മേഘങ്ങള്‍ രൂപപ്പെടാനും ചിലയിടങ്ങളില്‍ മിന്നലോട് കൂടിയ മഴയും ചെറിയ പൊടിക്കാറ്റുകള്‍ക്കും സാധ്യതയുണ്ട് എന്ന് യുഎഇ കാലാവസ്ഥാ വകുപ്പ് മുന്നറിയിപ്പ് നല്‍കുന്നുണ്ട്.
ഏതാനും ദിവസങ്ങള്‍ കഴിയുന്നതോടെ സൗദിയിലും അന്തരീക്ഷതാപനില കുറഞ്ഞു തുടങ്ങും. ഇതോടെ അറേബ്യയില്‍ ഉടനീളം എന്നപോലെ സൗദിയിലും മഴക്കാലം എത്തുമെന്ന് ജിദ്ദ ആസ്‌ട്രോണമിക്കല്‍ സൊസൈറ്റി പ്രസിഡണ്ട് മജീദ് അബു സഹ്‌റ വിശദീകരിച്ചു
