ന്യൂഡൽഹി: ദീപാവലി ആഘോഷത്തിനിടെ വടക്കുകിഴക്കൻ ഡൽഹിയിലെ ഷഹ്‌ദാരയിൽ വെടിവെപ്പ്. ആയുധധാരികളായ രണ്ട് പേർ വീടിന് പുറത്ത് വെടിയുതിർത്തതിനെ തുടർന്ന് 40കാരനും അവരുടെ 16 വയസുള്ള കൗമാരക്കാരനും കൊല്ലപ്പെട്ടു. 10 വയസുള്ള മകൻ കൃഷ് ശർമ്മക്ക് പരിക്കേറ്റിട്ടുണ്ട്. ആകാശ് ശർമ്മ, അനന്തരവൻ ഋഷഭ് ശർമ്മ എന്നിവരാണ് മരിച്ചത്.
അക്രമികളെ അറിയാമെന്നും ഭൂമിയെ ചൊല്ലി വർഷങ്ങളായി ഇവർ തമ്മിൽ തർക്കം നിലനിന്നിരുന്നതായും ആകാശിന്‍റെ ഭാര്യ പറഞ്ഞു. രാത്രി എട്ട് മണിയോടെ ദീപാവലി ആഘോഷിക്കുന്നതിനിടെയാണ് ആക്രമണം നടന്നത്.
Also Read : തിരഞ്ഞെടുപ്പ് ജയത്തിനായി കോൺഗ്രസ് സമ്മാന കൂപ്പൺ നൽകുന്നു: കുമാരസ്വാമി
മൂവരെയും ഉടൻ ആശുപത്രിയിൽ എത്തിച്ചെങ്കിലും ചികിൽസയിലിരിക്കെ ആകാശും ഋഷഭും മരിച്ചു. വ്യക്തിവൈരാഗ്യമാണ് വെടിവെപ്പിന് കാരണമെന്നാണ് പ്രാഥമിക നിഗമനം. അഞ്ച് റൗണ്ട് വെടിയുതിർത്തിട്ടുണ്ടെന്ന് അന്വേഷണത്തിൽ വ്യക്തമായി. കുടുംബാംഗങ്ങളുടെ മൊഴി രേഖപ്പെടുത്തുമെന്നും കൂടുതൽ അന്വേഷണം തുടരുമെന്നും പൊലീസ് അറിയിച്ചു.
