ചെന്നൈ: കൽക്കരി അടുപ്പിൽ നിന്നുള്ള പുക ശ്വസിച്ച് 2 യുവാക്കൾ മരിച്ചു. കൊടൈക്കനാലിലാണ് സംഭവം. ബാർബിക്യൂ ചിക്കൻ തയാറാക്കിയ ശേഷം കൽക്കരി അടുപ്പു കെടുത്താൻ മറന്നു പോയിരുന്നു, ഉറക്കത്തിനിടെ അടുപ്പിൽ നിന്നുയർന്ന പുക ശ്വസിച്ചാണ് യുവാക്കൾ മരണപ്പെട്ടത്. തിരുച്ചിറപ്പള്ളി സ്വദേശികളായ ആനന്ദ ബാബു, ജയകണ്ണൻ എന്നിവരാണു മരിച്ചത്.
ഇവർക്കൊപ്പമുണ്ടായിരുന്ന സഹോദരൻമാരായ ശിവശങ്കറും ശിവരാജും മറ്റൊരു മുറിയിൽ ഉറങ്ങിയതിനാൽ രക്ഷപ്പെട്ടു. വെള്ളിയാഴ്ചയാണു യുവാക്കൾ ചിന്നപ്പള്ളത്തെ റിസോർട്ടിൽ എത്തിയത്. ലിവിങ് റൂമിൽ ബാർബിക്യൂ ചിക്കൻ പാകം ചെയ്ത ശേഷം അടുപ്പിലെ തീ കെടുത്താതെയാണു സംഘം ഉറങ്ങാൻ പോയത്.
രാവിലെ യുവാക്കൾ ഉണരാതിരുന്നതിനെ തുടർന്ന് മെഡിക്കൽ സംഘം എത്തി നടത്തിയ പരിശോധനയിലാണ് മരണം സ്ഥിരീകരിച്ചത്. അടുപ്പ് കെടുത്താതിരുന്നതിനാൽ രൂപപ്പെട്ട വിഷാംശമുള്ള വാതകങ്ങൾ മൂലം ശ്വാസംമുട്ടിയാണ് മരണമെന്ന് പൊലീസ് പ്രാഥമിക അന്വേഷണത്തിനു ശേഷം പറഞ്ഞു.
