ഭക്ഷ്യക്ഷാമത്തിന് പരിഹാരമായി ആന; അനുമതി നൽകി നമീബിയൻ സർക്കാർ

വിൻഹോക്ക്: ഭക്ഷ്യക്ഷാമത്തിന് പരിഹാരമായി വന്യമൃഗങ്ങളെ ഭക്ഷിക്കാൻ ഉത്തരവിട്ട് നമീബിയൻ സർക്കാർ. ഭക്ഷ്യ പ്രതിസന്ധി മൂലം കഷ്ടതയനുഭവിക്കുന്ന ജനങ്ങൾക്ക് ഭക്ഷണത്തിനായി ഹിപ്പോകളും ആനകളും ഉൾപ്പെടെ 700 ലധികം വന്യമൃഗങ്ങളെ കൊല്ലാനുള്ള അനുമതിയാണ് സർക്കാർ നൽകിയിരിക്കുന്നത്. കൊടും വരൾച്ചയാണ് രാജ്യത്തെ ഇത്രകണ്ട് ക്ഷാമത്തിലേക്ക് നയിച്ചിരിക്കുന്നത്. ദശലക്ഷക്കണക്കിന് ആളുകളെ പട്ടിണിയിലേക്കും കടുത്ത ഭക്ഷ്യക്ഷാമത്തിലേക്കും തള്ളിവിടുന്ന നൂറ്റാണ്ടിലെ ഏറ്റവും മോശമായ വരൾച്ചയാണ് നമീബിയിൽ സംഭവിച്ചിരിക്കുന്നത്.

2023 ഒക്ടോബറിൽ ആരംഭിച്ച ദശാബ്ദങ്ങളിലെ ഏറ്റവും മോശമായ വരൾച്ചയാണ് ദക്ഷിണാഫ്രിക്കയിൽ അനുഭവപ്പെടുന്നത്. കാലാവസ്ഥാ വ്യതിയാനവും എൽ നിനോ കാലാവസ്ഥാ പ്രതിഭാസവും മൂലം വർദ്ധിച്ചുവരുന്ന താപനില വളരെ കുറഞ്ഞ മഴയ്ക്ക് കാരണമായി. ഈ പ്രദേശത്ത് സാധാരണയായി ഏറ്റവും കൂടുതൽ മഴ ലഭിക്കുന്ന ഫെബ്രുവരിയിൽ, ആവശ്യമുള്ളതിൻ്റെ 20 ശതമാനത്തിൽ താഴെ മാത്രമാണ് ലഭിച്ചത്. കടുത്ത വരൾച്ചയെ തുടർന്ന് സിംബാബ്‌വെ, മലാവി, സാംബിയ, നമീബിയയും എന്നിവിടങ്ങളിൽ അടിയന്തരാവസ്ഥ പ്രഖ്യാപിച്ചിട്ടുണ്ട്.

Also Read: ഗാസയിലെ ബന്ദികളെ തിരികെ കൊണ്ടുവരണം; ഇസ്രായേലിൽ രാജ്യവ്യാപക പൊതു പണിമുടക്ക്

കൃഷിയെയും കന്നുകാലികളെയും ആശ്രയിച്ച് ജീവിക്കുന്ന ജനവിഭാഗമാണ് രാജ്യത്ത് കൂടുതലായുള്ളത്. ആവശ്യമായ മഴ ലഭിക്കാത്തത് വലിയ പ്രതിസന്ധി ഉണ്ടാക്കിയിരിക്കുകയാണ്. 2013 നും 2019 നും ഇടയിൽ മൂന്ന് തവണ വരൾച്ച നമീബിയയിൽ അടിയന്തരാവസ്ഥ പ്രഖ്യാപിച്ചിരുന്നു. ജൂലൈ മുതൽ സെപ്തംബർ വരെയുള്ള കാലയളവിൽ 2.5 ദശലക്ഷം നമീബിയൻ ജനസംഖ്യയുടെ പകുതിയോളം ആളുകൾക്ക് ഉയർന്ന അളവിലുള്ള ഭക്ഷ്യ അരക്ഷിതാവസ്ഥ അനുഭവപ്പെട്ടതായി അൽ ജസീറ ഒരു റിപ്പോർട്ടിൽ പറഞ്ഞു.

വരൾച്ചയുടെ ഫലമായി രാജ്യത്തെ ഭക്ഷ്യശേഖരത്തിൻ്റെ 84 ശതമാനവും തീർന്നുവെന്ന് ഐക്യരാഷ്ട്രസഭയെ ഉദ്ധരിച്ച് അൽ ജസീറ റിപ്പോർട്ടിൽ കൂട്ടിച്ചേർത്തു. തൽഫലമായി നമീബിയയിലെ പരിസ്ഥിതി മന്ത്രാലയം 30 ഹിപ്പോകൾ, 60 എരുമകൾ, 50 ഇംപാലകൾ, 100 നീല കാട്ടുമൃഗങ്ങൾ, 300 സീബ്രകൾ, 83 ആനകൾ, 100 എലാൻഡുകൾ (ആൻ്റലോപ്പുകൾ) എന്നിവയുൾപ്പെടെ 723 വന്യമൃഗങ്ങളെ കൊല്ലാൻ പദ്ധതിയിട്ടിട്ടുണ്ട്. ദുരിതാശ്വാസ പരിപാടിക്കായി 157 വന്യമൃഗങ്ങളിൽ നിന്ന് 56,875 കിലോഗ്രാം മാംസം സർക്കാർ ഇതിനകം ശേഖരിച്ചിട്ടുണ്ട്. വരൾച്ച സ്ത്രീകൾക്കും പെൺകുട്ടികൾക്കും നേരെയുള്ള അതിക്രമങ്ങളുടെ അപകടസാധ്യത വർദ്ധിപ്പിച്ചിട്ടുണ്ട്.

Also Read: ആളുകൾക്ക് മുന്നിലേക്ക് കൊണ്ടുവരുന്നതിനിടെ പരിശീലകയെ കടിച്ച് കുടഞ്ഞ് കടുവ

പലപ്പോഴും സ്ത്രീകളും കുട്ടികളും വെള്ളമെടുക്കാൻ വളരെ ദൂരം നടക്കേണ്ടിവരുന്നു. ഇത് ആക്രമണ സാധ്യത വർധിപ്പിക്കുന്നു. കൂടാതെ, ശുദ്ധജലത്തിൻ്റെ അഭാവം മൂലം കോളറ പോലുള്ള രോഗങ്ങളും പടരുന്നുണ്ട്. വന്യമൃഗങ്ങളെ, പ്രത്യേകിച്ച് ആന, ഹിപ്പോ തുടങ്ങിയ ഇനങ്ങളെ കൊല്ലാനുള്ള നമീബിയയുടെ തീരുമാനം അന്താരാഷ്ട്ര വിവാദങ്ങൾക്ക് തിരികൊളുത്തി. രാജ്യത്തിൻ്റെ ജൈവവൈവിധ്യത്തിനും വന്യജീവി സംരക്ഷണത്തിനും ഇത് ദോഷം ചെയ്യുമെന്ന് വാദിച്ച് മൃഗാവകാശ സംഘടനകളും സംരക്ഷകരും ഈ നീക്കത്തെ വിമർശിച്ച് രംഗത്തെത്തിയിട്ടുണ്ട്. ഉടനടിയുള്ള ഭക്ഷ്യപ്രതിസന്ധി ലഘൂകരിക്കാൻ ഇതല്ലാതെ മറ്റൊരു മാർഗ്ഗമില്ലെന്ന് നമീബിയൻ സർക്കാർ പ്രതികരിച്ചു.