അർജുന്റെ ലോറിയിൽ കരളുരുകുന്ന കാഴ്ചകൾ

ഷിരൂർ: ഗംഗാവാലി പുഴയിൽ മണ്ണിടിച്ചിലിൽ അക​പ്പെട്ട അർജുന്റെ ലോറിയിൽ നിന്ന് കണ്ടെത്തിയ വസ്തുക്കൾ കണ്ട് കൂടിനിന്നവരുടെ ഉള്ളം തകർന്നു. വീട്ടിൽ മോന്റെ കൂടെ കളിക്കാൻ ഉപയോഗിക്കുന്ന ലോറിയും കളിപ്പാട്ടങ്ങളും വസ്ത്രവും മൊബൈലും കാബിനിൽനിന്ന് കണ്ടെടുത്തു. കുട്ടിയോടൊപ്പം കളിച്ച ശേഷം ഈ കളിപ്പാട്ടം അർജുൻ ലോറിയിൽ തന്നെ സൂക്ഷിക്കുകയായിരുന്നു പതിവ്. അർജുൻ ഉപയോഗിച്ച രണ്ട് മൊബൈലും വാച്ചുകളും ലോറിയുടെ കാബിനിൽനിന്ന് ലഭിച്ചു. ഭക്ഷണം പാകം ചെയ്യാനുള്ള പാത്രങ്ങളും ഉപകരണങ്ങളും ഒക്കെ ലോറിയിൽ തന്നെ ഉണ്ടായിരുന്നു.