തങ്ങളുടെ ആദ്യത്തെ കണ്മണിക്കായുള്ള കാത്തിരിപ്പിലാണ് അമല പോളും ഭര്‍ത്താവ് ജഗത് ദേശായിയും. ഈ അവസരത്തില്‍ ഭര്‍ത്താവിനേക്കുറിച്ചുള്ള ചെറുകുറിപ്പുമായി എത്തിയിരിക്കുകയാണ് അമലാ പോള്‍. ഗര്‍ഭകാലത്ത് ജഗത് തനിക്കുനല്‍കുന്ന പിന്തുണയേക്കുറിച്ചാണ് അമല സോഷ്യല്‍ മീഡിയയില്‍ പോസ്റ്റ് ചെയ്തിരിക്കുന്നത്.
ഈ വിലയേറിയ ഗര്‍ഭകാലയാത്രയില്‍ തനിക്ക് കരുത്തായതിന് നന്ദിയെന്നാണ് അമല എഴുതിയത്. നിങ്ങളെപ്പോലെ അവിശ്വസനീയമായ ഒരു മനുഷ്യനെ അര്‍ഹിക്കാന്‍ താന്‍ ഈ ജീവിതത്തില്‍ ശരിക്കും അത്ഭുതകരമായ എന്തെങ്കിലും ചെയ്തിരിക്കണമെന്നും അമല പറയുന്നു.
‘എന്റെ അരികില്‍ ചെലവഴിച്ച രാത്രികള്‍മുതല്‍ എന്റെ അസ്വാസ്ഥ്യങ്ങള്‍ സൗമ്യമായി ലഘൂകരിച്ച്, എന്നിലുള്ള നിങ്ങളുടെ അചഞ്ചലമായ വിശ്വാസവും എന്നില്‍ ശക്തി നിറച്ച നിങ്ങളുടെ വാക്കുകളും വരെ, ഈ വിലയേറിയ ഗര്‍ഭകാല യാത്രയില്‍ എന്റെ കരുത്തായതിന് നന്ദി. എന്റെ ആത്മവിശ്വാസം ചോര്‍ന്നൊലിക്കുന്ന ഏറ്റവും ചെറിയ നിമിഷങ്ങളില്‍ പോലും എന്നെ താങ്ങാനായി താഴേക്ക് പറക്കാനുള്ള നിങ്ങളുടെ സന്നദ്ധത എന്റെ ഹൃദയത്തെ നന്ദിയും സ്‌നേഹവും കൊണ്ട് നിറയ്ക്കുന്നു. നിങ്ങളെപ്പോലെ അവിശ്വസനീയമായ ഒരു മനുഷ്യനെ അര്‍ഹിക്കാന്‍ ഞാന്‍ ഈ ജീവിതത്തില്‍ ശരിക്കും അത്ഭുതകരമായ എന്തെങ്കിലും ചെയ്തിരിക്കണം. എന്റെ നിരന്തരമായ ശക്തിയുടെയും സ്‌നേഹത്തിന്റെയും അചഞ്ചലമായ പിന്തുണയുടെയും ഉറവിടമായതിന് നന്ദി. വാക്കുകള്‍ക്ക് പ്രകടിപ്പിക്കാന്‍ കഴിയുന്നതിനേക്കാള്‍ ഞാന്‍ നിന്നെ സ്‌നേഹിക്കുന്നു.’ അമലയുടെ വാക്കുകള്‍.
2023 നവംബറിലാണ് അമല പോളും സുഹൃത്ത് ജഗദ് ദേശായിയും വിവാഹിതരായത്. ഗോവ സ്വദേശിയായ ജഗത് ടൂറിസം – ഹോസ്പിറ്റാലിറ്റി മേഖലയിലാണ് പ്രവര്‍ത്തിക്കുന്നത്. ഈ വര്‍ഷം ജനുവരിയിലാണ് താന്‍ അമ്മയാകാനൊരുങ്ങുന്ന വിവരം അമല പങ്കുവെച്ചത്. ബ്ലെസി സംവിധാനം ചെയ്ത ആടുജീവിതമാണ് അമല പോളിന്റേതായി തിയേറ്ററുകളിലെത്തിയ ചിത്രം.
