രക്തത്തില്‍ പൊട്ടാസ്യത്തിന്റെ അളവു കുറഞ്ഞാന്‍ ശരീരം ചലിപ്പിക്കാന്‍ പോലും കഴിയാത്തത്ര ബലഹീനത അനുഭവപ്പെടാം. ശരീരത്തിലെ ഒരു പ്രധാന ഇലക്രോലൈറ്റാണ് പൊട്ടാസ്യം. തലച്ചോര്‍, കരള്‍, ഹൃദയം, ഞരമ്പുകള്‍, പേശികള്‍ തുടങ്ങി ശരീരത്തിന്റെ പ്രധാന അവയവങ്ങളില്‍ പൊട്ടാസ്യം സന്തുലനം വളരെ പ്രധാനമാണ്. അതിനാല്‍ ശരീരത്തില്‍ പൊട്ടാസ്യം കൂടുന്നതും കുറയുന്നതും ശ്രദ്ധിക്കണം. പൊട്ടാസ്യത്തിന്റെ അളവിലുണ്ടാകുന്ന മാറ്റം തലച്ചോര്‍, ഹൃദയം തുടങ്ങിയ അവയവങ്ങളുടെ പ്രവര്‍ത്തനത്തെ ബാധിക്കാം. മരണം വരെ സംഭവിക്കാം. രക്തത്തില്‍ പൊട്ടാസ്യത്തിന്റെ അളവു കുറയുന്നതിനെ ഹൈപ്പോകലീമിയ എന്നാണ് പറയുന്നത്. ഇത് വളരെ അപകടകരമായ അവസ്ഥയിലേക്ക് രോഗിയെ എത്തിക്കാം. പക്ഷാഘാതം, തളര്‍ച്ച, ക്രമരഹിതമായ ഹൃദയ താളം എന്നിവ അനുഭവപ്പെടാം. രക്താതിസമ്മര്‍ദം, ഹൃദയരോഗങ്ങള്‍, സിറോസിസ് തുടങ്ങിയ അസുഖങ്ങളുള്ളവര്‍ ശ്രദ്ധിക്കണം.
വൃക്ക രോഗികളിലാണ് പൊട്ടാസ്യം വ്യതിയാനം കൂടുതലായും കാണുന്നത്. ഛര്‍ദി, വയറിളക്കം എന്നിവ കാരണവും പൊട്ടാസ്യം അസന്തുലനം വരാം. ഹൃദയ പേശീ കോശങ്ങളില്‍ വരുന്ന പൊട്ടാസ്യത്തിന്റെ കുറവ് ഹൃദയത്തിലെ സ്വാഭാവിക വൈദ്യുത സ്പന്ദനങ്ങളെ തകിടം മറിച്ചു കളയും. അത് ടാക്കികാര്‍ഡിയ, ബ്രാഡികാര്‍ഡിയ, ഫിബ്രിലേഷന്‍, ഹൃദയമിടിപ്പിലെ അപാകത മുതല്‍ ചിലപ്പോള്‍ ഹൃദയാഘാതം തന്നെ വരുത്താം. പേശികളുടെ ബലക്കുറവ്, ഓക്കാനം, ഛര്‍ദി, മലബന്ധം, ശ്വസനത്തകരാറുകള്‍, ചിന്താക്കുഴപ്പം, ഓര്‍മ്മക്കുറവ് തുടങ്ങിയവയാണ് ഹൈപ്പോകലീമിയയുടെ പ്രധാന ലക്ഷണങ്ങള്‍.
