മനാമ: വിദേശികളെ ജോലിക്കെടുക്കുകയാണെങ്കിൽ അവരിൽനിന്ന് ഉയർന്ന ലേബർ ഫീസ് ഈടാക്കാൻ നിർദേശം. നിർദേശിക്കപ്പെട്ട എണ്ണം സ്വദേശികളെ ജോലിക്കെടുക്കാത്ത സ്ഥാപനങ്ങൾക്കാണ് നിർദേശം. ഹനാൻ ഫർദാന്റെ നേതൃത്വത്തിൽ അഞ്ച് എം.പിമാരാണ് പാർലമെന്റിൽ നിർദേശം മുന്നോട്ടുവെച്ചത്.
ബഹ്‌റൈനൈസേഷൻ ക്വാട്ട കൈവരിക്കുന്നതിൽ പരാജയപ്പെട്ട കമ്പനികൾ വിദേശ ജീവനക്കാരനെ നിയമിക്കുമ്പോൾ ഒരു ജീവനക്കാരന് 2,500 ദിനാർ വരെ എന്ന ക്രമത്തിൽ ഉയർന്ന ലേബർ ഫീസ് ഈടാക്കാനാണ് നിർദേശം.
Also Read: ‘യു.എ.ഇ സ്റ്റാര്‍ട്ടപ്പ് രാഷ്ട്രമായി വളർന്നുവരുന്നു’: ശൈഖ് സഊദ്
ശമ്പളത്തിന്റെ അടിസ്ഥാനത്തിൽ ഫീസ് ഈടാക്കാനാണ് നിർദേശം നൽകിയത്. പ്രതിമാസവേതനം 200 ദീനാർ വരെയുള്ള തൊഴിലാളിയെ നിയമിക്കുമ്പോൾ സ്ഥാപനം 500 ദിനാർ ലേബർ ഫീസ് നൽകണം. 201നും 500നും ഇടയിൽ ശമ്പളമുള്ളവർക്ക് 1000 ദിനാർ, 501നും 800 നും ഇടയിലാണ് ശമ്പളമെങ്കിൽ 1,500 ദിനാർ, 801 മുതൽ 1,200 വരെ ശമ്പളമുള്ളവർക്ക് 2,000 ദിനാർ, 1,200ൽ കൂടുതൽ ശമ്പളമുള്ളവർക്ക് 2,500 ദീനാർ എന്നിങ്ങനെ ഫീസ് ഈടാക്കാനാണ് നിർദേശം.
രണ്ട് വർഷത്തിലൊരിക്കൽ ലേബർ മാർക്കറ്റ് റെഗുലേറ്ററി അതോറിറ്റിക്ക് നൽകുന്ന തൊഴിൽ ഫീസിന് പുറമെയായിരിക്കും ഇത്. ഏറ്റവും കുറഞ്ഞ സ്വദേശിവത്കരണ ശതമാനം പാലിക്കാതെ, ഒരു പ്രവാസിയെ റിക്രൂട്ട് ചെയ്യാൻ ആഗ്രഹിക്കുന്നവർക്ക് നിലവിൽ 500 ദീനാർ ഫീസ് ഏർപ്പെടുത്തിയിട്ടുണ്ട്. ഇതേത്തുടർന്ന്, പുതുതായി നിയമിക്കപ്പെടുന്ന പ്രവാസി ജീവനക്കാരുടെ എണ്ണത്തിൽ കുറവുണ്ടായതായി എൽ.എം. ആർ.എ ചൂണ്ടിക്കാട്ടി.
