ഗുജറാത്ത് പോലീസ് യുവതിയെ കൊണ്ടുപോയേക്കുമെന്ന് ഭയന്ന മിശ്രവിവാഹിതരായ ദമ്പതികൾക്ക് സംരക്ഷണം നൽകാൻ ബോംബെ ഹൈക്കോടതി വെള്ളിയാഴ്ച മുംബൈ പോലീസിനോട് നിർദ്ദേശിച്ചു. ദമ്പതികൾ വ്യക്തിപരമായി സംസാരിച്ച ശേഷമാണ് കോടതി ഉത്തരവ്. നേരത്തെ വിവാഹിതനും മൂന്ന് കുട്ടികളുമുള്ള യുവാവിനെയാണ് താൻ വിവാഹം കഴിച്ചതെന്ന് വാദത്തിനിടെ യുവതി കോടതിയെ അറിയിച്ചു. സ്വന്തം ഇഷ്ടപ്രകാരമാണ് താൻ വിവാഹം കഴിച്ചതെന്നും അവർ കൂട്ടിച്ചേർത്തു.
മുസ്ലീം അവകാശങ്ങളും ആചാരങ്ങളും അനുസരിച്ച് വിവാഹം കഴിക്കാനാണു യുവതി അഹമ്മദാബാദിലെ വീട്ടിൽ നിന്നും മുംബൈ നിവാസിയായ യുവാവിനൊപ്പം ഇറങ്ങിത്തിരിച്ചത്. എന്നാൽ, യുവതിയെ കാണാനില്ലെന്ന് വീട്ടുകാർ പരാതി നൽകുകയും തുടർന്ന് 4,50,000 രൂപ വിലമതിക്കുന്ന സ്വർണാഭരണങ്ങളും പണവുമായി യുവതി ഒളിച്ചോടിയതായി കാണിച്ച് സഹോദരൻ യുവതിക്കെതിരെ മോഷണത്തിന് കേസ് കൊടുക്കുകയും ചെയ്തു. സംരക്ഷണത്തിനായി ദമ്പതികൾ ഹൈക്കോടതിയെ സമീപിച്ചതിനെ തുടർന്നാണ് ഇവർക്ക് സംരക്ഷണം നല്കാൻ കോടതി വിധിച്ചത്.
24 കാരിയായ യുവതിയുടെ മാതാപിതാക്കളും സഹോദരനും ഗുജറാത്ത് പോലീസിനൊപ്പം കോടതിയിൽ ഹാജരായിരുന്നു. 2024 ജൂലൈ 15 ന് വീട്ടിൽ നിന്ന് ഓടിപ്പോയപ്പോൾ താൻ ഒന്നും മോഷ്ടിച്ചിട്ടില്ലെന്ന് യുവതി ബെഞ്ചിനോട് പറഞ്ഞു. താൻ ധരിച്ചിരുന്ന സ്വർണ്ണ ചെയിനും കമ്മലും മാതാപിതാക്കൾക്ക് വേണമെങ്കിൽ കൈമാറാൻ പോലും തയ്യാറാണെന്ന് യുവതി പറഞ്ഞു.എന്നാൽ മാതാപിതാക്കളുടെയൊപ്പം വീട്ടിലേക്ക് മടങ്ങാൻ യുവതി വിസമ്മതിച്ചു. മാതൃസഹോദരനൊപ്പം സ്ഥാപനത്തിൽ പങ്കാളിയായിരുന്ന യുവാവും യുവതിയും തമ്മിൽ കഴിഞ്ഞ ആറ് വർഷമായി അടുപ്പമുണ്ടായിരുന്നു.
