വണ്ടൂർ: മലപ്പുറത്തെ മഞ്ചേരി റോഡിലെ കടയിൽ നടന്ന മോഷണത്തിൽ അന്തർ സംസ്ഥാന മോഷ്ടാവ് എടവണ്ണ പെരകമണ്ണ സ്വദേശി വെള്ളാട്ടുചോല റഷീദ് എന്ന കട്ടർ റഷീദിനെ (50) പൊലീസും നിലമ്പൂർ ഡാൻസാഫും ചേർന്ന് പിടികൂടി. വണ്ടൂർ മഞ്ചേരി റോഡിലുള്ള കെ.എ.കെ സ്റ്റീൽസ് ആൻഡ് സിമന്റ് കടയിൽനിന്ന് കഴിഞ്ഞ 12ന് പുലർച്ചെ 52,000 രൂപ മോഷ്ടിച്ച സംഭവത്തിലാണ് വണ്ടൂർ ഇൻസ്പെക്ടർ കെ. സലീമിന്റെ നേതൃത്വത്തിൽ പ്രതിയെ അറസ്റ്റ് ചെയ്തത്.
മോഷണം നടത്തുന്നതിന്റെ സി.സി.ടി.വി ദൃശ്യങ്ങൾ ലഭിച്ചിരുന്നെങ്കിലും മുഖം മറച്ചിരുന്നതിനാൽ പ്രതിയെ തിരിച്ചറിയാനായിരുന്നില്ല. തുടർന്ന് പ്രത്യേക അന്വേഷണ സംഘം ശാസ്ത്രീയ തെളിവുകൾ ശേഖരിച്ച് നടത്തിയ അന്വേഷണത്തിലാണ് പ്രതിയെ കുറിച്ച് സൂചന ലഭിച്ചത്. പൊലീസ് പിടിയിലാകുമ്പോൾ പ്രതിയുടെ കൈവശം രണ്ട് ദിവസം മുമ്പ് കൂടത്തായിൽനിന്ന് മോഷ്ടിച്ച ബൈക്കും ബാഗിൽ കമ്പിപ്പാരയും കൈയുറകളും വ്യാജ നമ്പർ പ്ലേറ്റും ഉൾപ്പെടെ സാമഗ്രികളുമുണ്ടായിരുന്നു. കേരളത്തിനകത്തും പുറത്തും കടകൾ, വീടുകൾ, പെട്രോൾ പമ്പുകൾ തുടങ്ങിയവ കുത്തിത്തുറന്ന് മോഷണം നടത്തിയ നിരവധി കേസുകളിൽ വർഷങ്ങളായി ജയിൽവാസം അനുഭവിച്ചിട്ടുള്ളയാളാണ് പ്രതി.
Also Read :വനിതാ പൊലീസ് ഉദ്യോഗസ്ഥയെ സഹപ്രവര്‍ത്തകന്‍ പീഡിപ്പിച്ചെന്ന് പരാതി
ഒരു മാസം മുമ്പാണ് വൈത്തിരി ജയിലിൽനിന്നും മോചിതനായത്. മോഷ്ടിച്ച ബൈക്കിൽ പകൽ കറങ്ങിനടന്ന് വീടുകൾ കണ്ടെത്തി രാത്രി മോഷണം നടത്തുന്നതാണ് പ്രതിയുടെ രീതി. കേരളത്തിലെ വിവിധ സ്‌റ്റേഷനുകളിൽ പ്രതിക്കെതിരെ ജാമ്യമില്ലാ വാറണ്ട് നിലവിലുണ്ട്. പ്രതിയെ പെരിന്തൽമണ്ണ കോടതിയിൽ ഹാജരാക്കി.
