ഏറ്റവും പുതിയ മോഡൽ ഐഫോൺ 16 സീരീസ് ഇനി ഇന്ത്യൻ വിപണിയിൽ എത്താൻ ഏതാനും ആഴ്ചകൾ കൂടെ മാത്രം. ഔദ്യോഗിക ലോഞ്ച് സെപ്റ്റംബർ 10ന് എന്ന് സൂചനാ റിപോർട്ടുകൾ. എന്നാൽ ലോഞ്ച് തീയതി ആപ്പിൾ ഇതുവരെ പുറത്ത് വിട്ടിട്ടില്ല. ഐഫോൺ 16 സീരീസ് വിൽപ്പന ആരംഭിക്കുന്നതിന് മുമ്പ് തന്നെ സ്മാർട്ട്‌ഫോൺ മോഡലുകൾ വികസിപ്പിക്കുന്നതിനുള്ള നിർമ്മാണ പ്രക്രിയക്കായി കമ്പനി 50000-ത്തിലധികം തൊഴിലാളികളെ നിയമിച്ചിട്ടുണ്ടെന്നാണ് നിലവിൽ സൂചന.അതേസമയം ഐഫോൺ പ്രേമികൾ കാത്തിരിക്കുന്ന ആപ്പിൾ ഇവൻ്റിനെക്കുറിച്ച് കമ്പനി ഉടൻ തന്നെ ഔദ്യോഗിക പ്രഖ്യാപനം നടത്തിയേക്കും.
എന്തൊക്കെ മാറ്റങ്ങൾ പ്രതീക്ഷിക്കാം
ഐഫോൺ 16 സീരീസിലെ നാല് മോഡലുകൾ ആപ്പിൾ പുറത്തിറക്കുമെന്നാണ് ഐഫോൺ പ്രേമികൾ പ്രതീക്ഷിക്കുന്നത്. കൂടാതെ ഐഫോൺ 16, ഐഫോൺ 16പ്ലസ് , ഐഫോൺ 16 പ്രോ, ഐഫോൺ 16 പ്രോമാക്സ് മോഡലുകൾ വിപണിയിൽ അവതരിപ്പിച്ചേക്കും.
എന്നാൽ പുതിയ ഐഫോൺ 16 സീരീസ് ആപ്പിൾ ഇന്റ്ലിജൻസ് ഫീച്ചറോട് കൂടിയതായിരിക്കും. എഐ പവർ ഫീച്ചറുകൾ ആയിരിക്കും പ്രധാന ആകർഷണം. എഐ റൈറ്റിംഗ് ടൂളുകൾ, കുറിപ്പുകൾ, സന്ദേശങ്ങൾക്കായുള്ള ആപ്പ് എന്നിവയെല്ലാം പ്രതീക്ഷിക്കാം.
കൂടാതെ എല്ലാ ഐഫോൺ16 മോഡലുകളിൽ ആപ്പിൾ പുതിയ എ18 സീരീസ് ചിപ്പുകൾ ആണ് ഉൾപ്പെടുത്തുക. ഐഫോൺ 16 സ്റ്റാൻഡേർഡ് മോഡലുകളിൽ ഭാരം കുറഞ്ഞ എ18 ചിപ്‌സെറ്റ് ഉണ്ടായിരിക്കും. ഐഫോൺ 16 പ്രോ മോഡലുകളിൽ എ18 പ്രോ ചിപ്‌സെറ്റായിരിക്കും ഉപയോഗിക്കുക എന്നും സൂചനയുണ്ട്. ഐഫോൺ16 സ്റ്റാൻഡേർഡ് മോഡലുകളിലും പ്രോ മോഡലുകളിലും ചില ചെറിയ ഡിസൈൻ മാറ്റങ്ങൾ ഉണ്ടാകും. സ്പേഷ്യൽ റെക്കോർഡിംഗ് ക്യാമറ, ഐഫോൺ 16 പ്രോ, ഐഫോൺ 16 പ്രോ മാക്സ് എന്നിവയ്ക്ക് യഥാക്രമം 6.3 ഇഞ്ച്, 6.9 ഇഞ്ച് വലിപ്പമുള്ള വലിയ ഡിസ്‌പ്ലേ എന്നിവ ഉണ്ടായിരിക്കും. എന്നാൽ ഐഫോൺ 16 മോഡലുകളിൽ പുതിയ “ക്യാപ്‌ചർ ബട്ടൺ” ഉണ്ടായേക്കാം. സ്റ്റാൻഡേർഡ് മോഡലിന് ആക്ഷൻ ബട്ടണും ഉണ്ടായിരിക്കും.
കൂടാതെ വരുന്ന സൂചന റിപ്പോർട്ടുകൾ പ്രകാരം ഐഫോൺ 16 പ്രോ, ഐഫോൺ 16 പ്രോ മാക്സ് എന്നീ മോഡലുകളിൽ 48എംപി അൾട്രാ വൈഡ് ക്യാമറ ഉണ്ടായേക്കാം. കൂടാതെ, ഐഫോൺ 16 പ്രോ മാക്‌സിൽ 300 എംഎം വരെ ഫോക്കൽ ലെങ്ത് വാഗ്ദാനം ചെയ്യുന്ന ടെലിഫോട്ടോ പെരിസ്‌കോപ്പ് ക്യാമറ അവതരിപ്പിച്ചേക്കാമെന്നും സൂചനയുണ്ട്. ഇവയൊന്നും കൂടാതെ ആപ്പിൾ ഐഫോൺ 16 സീരീസിൻ്റെ ചാർജിംഗ് വേഗത്തിലായിരിക്കും. 5ജി ക്വാൽകോം മോഡം, വേഗതയേറിയ വൈഫൈ എന്നിവയും ആപ്പിൾ ഫോൺ പ്രേമികൾക്ക് പ്രതീക്ഷക്കുള്ള വകയാണ്.
