മുംബൈ: ഇന്ത്യന്‍ സൂപ്പര്‍ ലീഗില്‍ കേരള ബ്ലാസ്റ്റേഴ്സ് ഇന്ന് കളത്തിലിറങ്ങും. മുംബൈ സിറ്റി എഫ്.സിയാണ് ബ്ലാസ്റ്റേഴ്‌സിന്റെ എതിരാളികള്‍. വൈകുന്നേരം 7.30ന് മുംബൈ ഫുട്‌ബോള്‍ അരീനയിലാണ് മത്സരം നടക്കുക. ഇരു ടീമിനും നിര്‍ണായകമാണ് ഈ കളി. മഞ്ഞപ്പട നിലവില്‍ ആറ് മത്സരങ്ങളില്‍ രണ്ടുവീതം ജയവും തോല്‍വിയും സമനിലയുമായി എട്ട് പോയന്റില്‍ ഒമ്പതാം സ്ഥാനത്താണ്.
കളിക്കളത്തില്‍ മികച്ച പ്രകടനം കാഴ്ചവെക്കാന്‍ മഞ്ഞപ്പടയ്ക്ക് ഇത്തവണ കഴിഞ്ഞിട്ടില്ലെന്ന് തന്നെ പറയാം. മുംബൈ സിറ്റിയുടെ സ്ഥിതി ഇതിലും മോശമാണ്. ചാമ്പ്യന്മാരെന്ന പേര് മാത്രമേ ഉള്ളൂ. മുബൈക്കും ഇത്തവണ കളിക്കളത്തില്‍ കരുത്ത് കാട്ടാന്‍ കഴിഞ്ഞിട്ടില്ല. അഞ്ച് മത്സരങ്ങളില്‍ ജയിക്കാനായത് ഒന്നില്‍ മാത്രമാണ്. മൂന്ന് സമനിലയും ഒരു തോല്‍വിയും ചേര്‍ത്ത് ആറ് പോയന്റാണ് മുംബൈ സിറ്റി എഫ്.സിക്കുള്ളത്.
