പ്രശാന്ത് വര്‍മ്മ സിനിമാറ്റിക് യൂണിവേഴ്സിലെ അടുത്ത ചിത്രമാണ് ജയ് ഹനുമാന്‍. ഈ യൂണിവേഴ്‌സിന്റെ ഭാഗമായി ആദ്യം പുറത്തിറങ്ങിയ ചിത്രമായിരുന്നു ‘ഹനുമാന്‍’. സിനിമയുടെ അവസാനം ‘ജയ് ഹനുമാന്‍’ എന്ന രണ്ടാം ഭാഗത്തെക്കുറിച്ചുള്ള സൂചനകള്‍ സംവിധായകന്‍ തന്നിരുന്നു. ഇപ്പോഴിതാ സിനിമയുടെ പുതിയ അപ്‌ഡേറ്റ് പുറത്തുവന്നിരിക്കുകയാണ്. ചിത്രത്തിന്റെ ഫസ്റ്റ് ലുക്ക് പോസ്റ്റര്‍ അണിയറപ്രവര്‍ത്തകര്‍ പുറത്തുവിട്ടു.
ചിത്രത്തില്‍ ഹനുമാനായി എത്തുന്നത് റിഷഭ് ഷെട്ടിയാണ്. ശ്രീരാമന്റെ വിഗ്രഹം കൈയ്യില്‍ ചേര്‍ത്ത് പിടിച്ചിരിക്കുന്ന റിഷബിനെയാണ് ഫസ്റ്റ് ലുക്കില്‍ കാണാന്‍ സാധിക്കുന്നത്. ആദ്യ ഭാഗത്തെക്കാള്‍ വലിയ ബഡ്ജറ്റില്‍ ആണ് ഈ ചിത്രം പുറത്തിറങ്ങുന്നത്. ചിത്രത്തിലെ മറ്റു അഭിനേതാക്കളെക്കുറിച്ചുള്ള വിവരങ്ങള്‍ പുറത്തുവിട്ടിട്ടില്ല. മൈത്രി മൂവി മേക്കേഴ്സ് ആണ് ‘ജയ് ഹനുമാന്‍’ നിര്‍മിക്കുന്നത്.
റിഷഭ് ഷെട്ടിയോടൊപ്പം ഒന്നിക്കാന്‍ കഴിഞ്ഞതില്‍ അഭിമാനമുണ്ടെന്നാണ് ഫസ്റ്റ് ലുക്ക് പോസ്റ്റര്‍ പങ്കുവച്ചുകൊണ്ട് പ്രശാന്ത് വര്‍മ്മ എക്‌സില്‍ കുറിച്ചത്. ചിത്രം ഐമാക്‌സിലും റിലീസ് ചെയ്യും. 40 കോടി മുതല്‍മുടക്കില്‍ ഒരുങ്ങിയ ആദ്യ ഭാഗമായ ഹനുമാന്‍ 350 കോടിയോളമാണ് ബോക്‌സ് ഓഫീസില്‍ നിന്ന് നേടിയത്. തെലുങ്കിലെ ഈ വര്‍ഷത്തെ ഏറ്റവും വലിയ വിജയ ചിത്രം കൂടിയാണിത്.
