ജാപ്പനീസ് ശാസ്ത്രജ്ഞൻ അകിര എൻഡോ (90) അന്തരിച്ചു. ഇദ്ദേഹമാണ് കൊളസ്ട്രോൾ കുറയ്ക്കാനുള്ള മരുന്നായ സ്റ്റാറ്റിൻ കണ്ടുപിടിച്ചത്. ജൂൺ അഞ്ചിനായിരുന്നു മരണം. ആയിരക്കണക്കിന് സൂക്ഷ്മജീവികളിലെ പരീക്ഷണത്തിനുശേഷം 1973-ലാണ് ഫംഗസായ പെനിസിലിയത്തിൽനിന്ന് അദ്ദേഹം മെവാസ്റ്റാറ്റിൻ വേർതിരിച്ചത്.
രക്തത്തിലെ ചീത്ത കൊളസ്ട്രോൾ നീക്കംചെയ്യുന്നതിൽ സ്റ്റാറ്റിൻ നിർണായകമായി. ഹൃദയാഘാതത്തിനും പക്ഷാഘാതത്തിനുമുള്ള ചികിത്സയിൽ ഇന്നും ലോകവ്യാപകമായി ഉപയോഗിക്കുന്ന മരുന്നാണിത്. നൊബേൽ സമ്മാനം ലഭിക്കുമെന്ന് പ്രതീക്ഷിച്ച കണ്ടുപിടിത്തമായിരുന്നെങ്കിലും അദ്ദേഹത്തിന് അത് ലഭിച്ചില്ല.
എന്നാൽ, 2008-ൽ യുഎസ് നൊബേൽ സമ്മാനം എന്നറിയപ്പെടുന്ന ലാസ്‌കർ അവാർഡ് അകിര എൻഡോയ്ക്ക് സമ്മാനിച്ചു. ശാസ്ത്ര, സാങ്കേതിക രംഗത്തെ മികവിന് നൽകുന്ന ജപ്പാൻ പ്രൈസ് നൽകി 2006-ൽ രാജ്യം അദ്ദേഹത്തെ ആദരിച്ചിരുന്നു.
