പാലക്കാട്: പാലക്കാട് സിപിഎം ഞങ്ങളുടെ സഹായം തേടിയിട്ടുണ്ടെന്ന് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍. ഞങ്ങള്‍ ആരുടെ സഹായവും തേടിപോയിട്ടില്ലെന്നും സുരേന്ദ്രന്‍ പറഞ്ഞു. കോണ്‍ഗ്രസില്‍ രാഹുല്‍ മങ്കൂട്ടത്തിലിനു സീറ്റ് നല്‍കിയതില്‍ എതിര്‍പ്പുണ്ട്. കരുണാകരനെയും ഭാര്യയെയും മുരളിയേയും ആക്ഷേപിച്ച ആള്‍ക്ക് സീറ്റ് നല്‍കിയെന്നും സുരേന്ദ്രന്‍ പറഞ്ഞു.
കണ്ണൂര്‍ ജില്ലാ പഞ്ചായത്ത് മുന്‍ പ്രസിഡന്റ് പി പി ദിവ്യയെ കാണാതായിട്ട് എത്ര ദിവസം ആയി? ആരെങ്കിലും അന്വേഷിച്ചോ? പൊലീസ് എന്താണ് ചെയ്യുന്നത്? ദിവ്യയെ സംരക്ഷിക്കുന്നത് സിപിഎം സംസ്ഥാന സെക്രട്ടറി എം വി ഗോവിന്ദനാണെന്നും സുരേന്ദ്രന്‍ ആരോപിച്ചു. അഭയം കൊടുത്തത് എകെജി സെന്ററാണ്. ഓഫിസ് സെക്രട്ടറി ബിജുവിനെ എന്തുകൊണ്ട് ചോദ്യം ചെയ്തില്ല? കൊടിയ വഞ്ചന ആണ് സിപിഎം കേരളത്തോട് കാണിക്കുന്നതെന്ന് പറഞ്ഞ സുരേന്ദ്രന്‍, മുഖ്യമന്ത്രി എന്തുകൊണ്ട് മിണ്ടുന്നില്ലെന്ന് ആരാഞ്ഞു. യുഡിഎഫിന് എന്തുകൊണ്ട് ഇതില്‍ താല്പര്യം ഇല്ലെന്നും സുരേന്ദ്രന്‍ ചോദിച്ചു.
മഅ്ദനിക്കു ഏറ്റവും കൂടുതല്‍ പിന്തുണ നല്‍കിയ പാര്‍ട്ടി സിപിഎം ആണെന്ന് കെ സുരേന്ദ്രന്‍. പി ജയരാജന്റെ പുസ്തകം കേരളത്തിലെ ജനങ്ങളുടെ കണ്ണില്‍ പൊടിയിടാനുള്ള ശ്രമമാണ്. ഇപ്പോള്‍ ലീഗ് വിരോധം പറയുന്നത് ഭൂരിപക്ഷ സമുദായ വോട്ട് ലക്ഷ്യമിട്ടാണ്. ജമാഅത്തെ ഇസ്ലാമി, പോപ്പുലര്‍ ഫ്രണ്ട് എന്നീ സംഘടനകളുമായി സിപിഎം സഖ്യം ഉണ്ടാക്കിയെന്നും സുരേന്ദ്രന്‍ ആരോപിച്ചു.
ലീഗിനോട് മുഖ്യമന്ത്രി കാട്ടുന്ന വിരോധം തെരഞ്ഞെടുപ്പ് കാലത്തേയ്ക്ക് മാത്രമാണെന്ന് സുരേന്ദ്രന്‍ പറഞ്ഞു. എക്കാലവും ലീഗിനെ സഹായിച്ചത് സിപിഎം ആണ്. ഇപ്പോള്‍ ലീഗ് വിരോധം പറയുന്നത് ഭൂരിപക്ഷ സമുദായ വോട്ട് ലക്ഷ്യമിട്ടാണ്. വോട്ടര്‍മാരെ കബളിപ്പിക്കാന്‍ ആണ് ലീഗ് വിരോധം പറയുന്നത്. ലീഗ് വര്‍ഗീയ കക്ഷി ആണോ മതേതര കക്ഷി ആണോ എന്ന് സിപിഎം നിലപാട് വ്യക്തമാക്കണമെന്നും സുരേന്ദ്രന്‍ ആവശ്യപ്പെട്ടു.
