കണ്ണൂർ: എ.ഡി.എം നവീൻ ബാബുവിന്റെ മരണത്തിൽ പങ്കുണ്ടെന്ന് ആരോപണമുയർന്നതിന് പിന്നാലെ മുഖ്യമന്ത്രിയെ വീട്ടിലെത്തി കണ്ട് കണ്ണൂർ ജില്ലാ കളക്ടർ. പിണറായിയിലെ വീട്ടിലെത്തിയാണ് കളക്ടർ അരുൺ കെ. വിജയൻ മുഖ്യമന്ത്രിയെ കണ്ടത്. 20മിനിറ്റിലേറെ സമയം മുഖ്യമന്ത്രിയുമായി സംസാരിച്ചതായാണ് വിവരം.
തനിക്കെതിരെ ഉയർന്ന ആരോപണങ്ങളിൽ കളക്ടർ മുഖ്യമന്ത്രിക്ക് വിശദീകരണം നൽകി എന്നാണ് സൂചന. കളക്ടർ ക്ഷണിച്ചിട്ടാണ് താൻ എ.ഡി.എമ്മിന്റെ യാത്രയയപ്പിന് പോയത് എന്നായിരുന്നു പി.പി. ദിവ്യയുടെ വാദം. എന്നാൽ ഇത് കളക്ടർ തള്ളി. നവീൻ ബാബുവിന്റെ ബന്ധുക്കളും കളക്ടറേറ്റ് ജീവനക്കാരും കളക്ടർക്കെതിരെ രംഗത്ത്‍വരികയും ചെയ്തിരുന്നു.
നവീന് അവധി നൽകുന്നതിൽ കടുത്ത നിയന്ത്രണം ഏർപ്പെടുത്തിയിരുന്നുവെന്നും സ്ഥലംമാറ്റ ഉത്തരവ് ലഭിച്ചിട്ടും വിടുതൽ നൽകാൻ വൈകിച്ചെന്നുമായിരുന്നു കുടുംബത്തിന്റെ മൊഴി. എ.ഡി.എമ്മിനെതിരെ ദിവ്യ നടത്താൻ പോകുന്ന പരാമർശങ്ങളെക്കുറിച്ച് കളക്ടർക്ക് അറിയുമായിരുന്നുവെന്നാണ് ജീവനക്കാർ മൊഴി നൽകിയത്.
