തിരുവനന്തപുരം: ആഭ്യന്തര വൈദ്യുതോൽപാദനം വർധിപ്പിക്കാൻ കാര്യക്ഷമമായി ഇടപെടാതെ ഇരുട്ടിൽതപ്പുന്ന കെ.എസ്.ഇ.ബി നിരക്ക് വർധനക്കായി ഉന്നയിക്കുന്നത് നഷ്ടക്കണക്കുകളുടെ പട്ടിക. 30 ശതമാനത്തിൽ താഴെയുള്ള ആഭ്യന്തര ഉൽപാദനം മൂലമുള്ള അധിക വൈദ്യുതി വാങ്ങൽ ഭാരം ഉപഭോക്താക്കളിലേക്ക് എത്തിക്കാൻ വിശദമായ കണക്കാണ് റെഗുലേറ്ററി കമീഷന് മുന്നിൽ കെ.എസ്.ഇ.ബി സമർപ്പിക്കാറുള്ളത്.
അടുത്ത മൂന്നു വർഷത്തേക്കുള്ള നിരക്ക് വർധന ആവശ്യപ്പെട്ട് കഴിഞ്ഞ ദിവസം റെഗുലേറ്ററി കമീഷന് നൽകിയ അപേക്ഷയിലും നഷ്ടക്കണക്കുകൾ ആവർത്തിക്കുന്നു. യൂനിറ്റിന് 30 പൈസയുടെ വരെ വർധനയിലൂടെ 2024-25ൽ 811.20 കോടിയുടെയും 2025-26 ൽ 551.26 കോടിയുടെയും 2026-27ൽ 53.82 കോടിയുടെയും വരുമാനമാണ് പ്രതീക്ഷിക്കുന്നത്. പുതുതായി നടപ്പാക്കാൻ ലക്ഷ്യമിടുന്ന ‘സമ്മർ താരിഫി’ലൂടെ ലക്ഷ്യമിടുന്നത് 2024-25ൽ 111.08 കോടിയുടെയും 2025-26 ൽ 116.34 കോടിയുടെയും 2026-27ൽ 122.08 കോടിയുടെയും വരുമാനമാണ്.
നിലവിൽ ഇന്ധന സർചാർജായി യൂനിറ്റിന് 19 പൈസ വരെ ഈടാക്കുന്ന സാഹചര്യത്തിൽ സമ്മർ താരിഫായി ജനുവരി മുതൽ മേയ് വരെ യൂനിറ്റിന് 10 പൈസകൂടി പിരിക്കാനുള്ള നിർദേശം റെഗുലേറ്ററി കമീഷൻ തെളിവെടുപ്പിൽ ഉപഭോക്താക്കളുടെ സംഘടനകൾ ശക്തമായി എതിർക്കാനാണ് സാധ്യത.
ജലവൈദ്യുത മേഖലയിലടക്കം തുടങ്ങിവെച്ച പദ്ധതികൾ വർഷങ്ങൾ കഴിഞ്ഞിട്ടും പൂർത്തീകരിക്കാതെ അമിത വിലക്ക് വൈദ്യുതി വാങ്ങുന്നതിന്‍റെ ബാധ്യത ജനങ്ങൾക്ക് മേൽ കെട്ടിവെക്കാനുള്ള ശ്രമം തെളിവെടുപ്പിൽ ചോദ്യം ചെയ്യപ്പെടും. ഈ മാസം അവസാനത്തോടെ നിരക്ക് വർധനയുമായി ബന്ധപ്പെട്ട് തെളിവെടുപ്പ് നടത്താനാണ് സാധ്യത.
