മസ്കത്ത്: വിമാനത്തിൽ മികച്ച ഭക്ഷണം നൽകുന്നവരുടെ പട്ടിക പുറത്ത്. പട്ടികയിൽ കുവൈത്ത് എയർലൈൻസാണ് ഒന്നാം സ്ഥാനത്ത്. ഒമാൻ എയർലൈൻസാണ് രണ്ടാംസ്ഥാനത്ത്. മണി സൂപ്പർ മാർക്കറ്റിന്‍റെ ട്രാവൽ ഇൻഷുറൻസ് ടീം നൂറിലധികം എയർലൈനുകളിൽനിന്നായി 27000ത്തിലധികം യാത്രക്കാരുടെ അഭിപ്രായങ്ങൾ വിലയിരുത്തിയാണ് സ്ഥാനങ്ങൾ തയാറാക്കിയത്.
10ൽ 8.58 പോയന്‍റാണ് കുവൈത്തിന്റെ പോയിന്റ്. ലോബ്സ്റ്ററും ബീഫുമടക്കം മികച്ച ഭക്ഷണം മിതമായ നിരക്കിൽ നൽകുന്നുവെന്ന പ്രത്യേകതയാണ് കുവൈത്ത് എയർലൈൻസിനെ മികച്ചതാക്കിയത്. തൊട്ടുപിന്നാലെ 8.44 പോയന്‍റുമായാണ് ഒമാൻ എയർ രണ്ടാം സ്ഥാനം നേടിയത്.
8.39 സ്കോറുമായി മിഡിൽ ഈസ്റ്റേൺ എയർലൈൻസ് മൂന്നാം സ്ഥാനവും, എയർ അൾജീരിയ, എയർ ബാൾട്ടിക് എന്നിവർ യഥാക്രമം നാലും അഞ്ചും സ്ഥാനങ്ങളും നേടി.
യാത്രക്കാർക്ക് പ്രിയപ്പെട്ട ഭക്ഷണം ഒരുക്കുന്നതിൽ ഖത്തർ എയർവേസ്, എമിറേറ്റ്സ്, ഇത്തിഹാദ്, ഗൾഫ് എയർ തുടങ്ങിയ മിഡിലീസ്റ്റിലെ മറ്റു എയർലൈൻസുകളും മികച്ച സ്ഥാനങ്ങൾ നേടി.
