എലിപ്പനി ഒരു ജന്തുജന്യ രോഗമാണ്. എലികളുടെ മൂത്രത്തിലൂടെ ആണ് ഈ രോഗം പടരുന്നത്. ഇതിലൂടെ പുറത്ത് വരുന്ന രോഗാണുക്കളാണ് മനുഷ്യരില്‍ ഈ രോഗം പടര്‍ത്തുന്നത്. രോഗബാധയുള്ള എലി കടിച്ചാലും ഈ രോഗം പടരാം. എലികള്‍ക്ക് പുറമെ അണ്ണാന്‍, പശു, ആട്, നായ എന്നിവയുടെ മൂത്രം, വിസര്‍ജ്യം മുതലായവ കലര്‍ന്ന വെള്ളവുമായി സമ്പര്‍ക്കം വരുന്നവര്‍ക്കും ഈ രോഗം ഉണ്ടാകാം. മനുഷ്യരുടെ കണ്ണ്, മൂക്ക്, വായ എന്നിവയിലൂടെയും രോഗം പടരാം. അതിശക്തമായ പനിയാണ് പ്രധാന ലക്ഷണങ്ങളിലൊന്ന്. കൂടാതെ പനിയ്ക്ക് ഒപ്പം വിറയലും ഉണ്ടാകും. പനി ഇല്ലാതെ കുളിര് തോന്നിയാലും ശ്രദ്ധിക്കണം. കഠിനമായ തലവേദന, പേശി വേദന, കാല്‍മുട്ടിന് താഴെ വേദന, നടുവേദന, കണ്ണിന് ചുവപ്പു നിറം, മഞ്ഞപ്പിത്തം, ത്വക്കിനും കണ്ണുകള്‍ക്കും മഞ്ഞ നിറമുണ്ടാവുക, മൂത്രം മഞ്ഞ നിറത്തില്‍ പോവുക എന്നീ ലക്ഷണങ്ങള്‍ ഉണ്ടെങ്കിലും സൂക്ഷിക്കേണ്ടതാണ്. എലിപ്പനി ഗുരുതരമായാല്‍ ശരീരത്തിലെ ആന്തരിക അവയവങ്ങളെ അത് ബാധിക്കാം.
മനുഷ്യരില്‍ നിന്ന് മനുഷ്യരിലേക്ക് കാര്യമായി രോഗം പടരില്ല. മനുഷ്യരെ ബാധിക്കുന്ന ലെപ്റ്റോസ്പൈറോസിസ് ബാക്ടീരിയകള്‍ അത്ര ശക്തമല്ല. വായുവിലൂടെ ഈ രോഗം പടരില്ല. രോഗം ബാധിച്ച വ്യക്തിയുടെ രക്തംപുരണ്ടതോ മൂത്രത്താല്‍ കുതിര്‍ന്നതോ ആയ തുണികള്‍ കൈകാര്യം ചെയ്യുന്ന വ്യക്തികള്‍ രോഗ ബാധയുണ്ടാകാനുള്ള സാധ്യതയുണ്ട്. മഴക്കാലത്ത് വീടും പരിസരവും വ്യത്തിയായി സൂക്ഷിക്കുകയാണ് ഏറ്റവും പ്രധാനമായും ചെയ്യേണ്ടത്. മലിനജലത്തിലോ അല്ലെങ്കില്‍ മഴ വെള്ളത്തിലോ ഇറങ്ങേണ്ട സാഹചര്യമുണ്ടായാല്‍ കാലുകളും കൈകളുമൊക്കെ വ്യത്തിയായി സോപ്പ് ഉപയോഗിച്ച് കഴുകണം. കെട്ടി നില്‍ക്കുന്ന വെള്ളത്തില്‍ ഒരു കാരണവശാലും കുട്ടികളെ ഇറക്കരുത്. വെള്ളത്തില്‍ ഇറങ്ങേണ്ട സാഹചര്യമുണ്ടാകുകയാണെങ്കില്‍ ഗ്ലൌസുകള്‍ ഉപയോഗിക്കാന്‍ ശ്രമിക്കുക.
