അബുദബി: നിർമിത ബുദ്ധി മേഖലയിൽ ആഗോളതലത്തിൽ ഏറ്റവും സ്വാധീനമുള്ള 100 പേരുടെ പട്ടികയിൽ ഇടം നേടി അബുദബി ഉപഭരണാധികാരിയും ദേശീയ സുരക്ഷാ ഉപദേഷ്ടാവുമായ ഷെയ്ഖ് തഹ്നൂൻ ബിൻ സായിദ് അൽ നഹ്യാൻ. നിർമ്മിത ബുദ്ധിയിൽ സുപ്രധാന പങ്കുവഹിക്കുന്ന 100 പേരെ കുറിച്ച് ടൈം മാഗസിൻ ആണ് പട്ടിക തയ്യാറാക്കിയത്.
അബുദബിയിലെ പ്രമുഖ നിർമ്മിത ബുദ്ധി, ക്ലൗഡ് കമ്പ്യൂട്ടിങ് ഗ്രൂപ്പായ ‘ജി 42’ ന്റെ ചെയർമാനാണ് ഷെയ്ഖ് തഹ്നൂർ. യുഎഇ അഡ്വാൻസ്ഡ് ടെക്‌നോളജി റിസർച്ച് കൗൺസിൽ സെക്രട്ടറി ജനറൽ ഫൈസൽ അൽ ബന്നായിയും പട്ടികയിൽ ഇടംപിടിച്ചിട്ടുണ്ട്. യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം ഇരുവരുടേയും നേട്ടത്തെ അഭിനന്ദിച്ചു.
‘നിരവധി സ്ഥാപനങ്ങൾ, കമ്പനികൾ, പങ്കാളിത്തങ്ങൾ, പ്രോഗ്രാമുകൾ എന്നിവയ്ക്ക് നേതൃത്വം നൽകുന്ന ഷെയ്ഖ് തഹ്നൂൻ ബിൻ സായിദ് അൽ നഹ്യാൻ, പ്രാദേശികമായി മാത്രമല്ല, ആഗോളതലത്തിലും രാജ്യത്തിന്റെ ഭാവി രൂപപ്പെടുന്നതിലും ആഗോള സമ്പദ് വ്യവസ്ഥയുടെ ഭാവി രൂപപ്പെടുന്നതിനും സംഭാവന ചെയ്യുന്നു. മേഖലയിലെ ദേശീയ ടീമിലെ അംഗമായ ഫൈസൽ അൽ ബന്നായി, ഈ രംഗത്തെ ലോകത്തെ മുൻനിര കമ്പനികളുടെ ഉദ്യോഗസ്ഥരിൽ ഉൾപ്പെടുന്ന. മാത്യരാജ്യത്തിന് നിങ്ങളെ ഓർത്ത് അഭിമാനമുണ്ട്’, ഷെയ്ഖ് മുഹമ്മദ് കുറിച്ചു.
