തിരുവനന്തപുരം: ബിജെപിയിൽ നിന്നും കോൺഗ്രസിലേക്ക് പോയ സന്ദീപിന് കൂടുതൽ കസേരകൾ കിട്ടട്ടെയെന്നും കോൺഗ്രസ് സന്ദീപിനെ മുറുകെ പിടിച്ചോട്ടെ എന്നും ബിജെപി സംസ്ഥാന അധ്യക്ഷൻ കെ.സുരേന്ദ്രൻ. സന്ദീപിന്റെ ഈ പാർട്ടി മാറ്റം നേരത്തേ ഉണ്ടാക്കിയ തിരക്കഥയാണ്. സന്ദീപിനെതിരെ ബി.ജെ.പി നടപടി ഉണ്ടായത് പുറത്തു പറയാൻ പറ്റാത്ത കാര്യത്തിനാണെന്നും സന്ദീപ് വാര്യർ ബലിദാനികളെ വഞ്ചിച്ചുവെന്നും കെ.സുരേന്ദ്രൻ കൂട്ടിച്ചേർത്തു.
പാലക്കാട്ടെ വോട്ടർമാർക്ക് അത് ശരിയായ രീതിയിൽ ഉൾക്കൊള്ളാൻ കഴിയുമെന്ന് വിചാരിക്കുന്നു. ബലിദാനികളുടെ കാര്യത്തിൽ അവരെ വഞ്ചിക്കുന്ന സമീപനമാണ് ഇപ്പോൾ ഉണ്ടായിരിക്കുന്നത്. തീർച്ചയായും ഇതൊരു അപ്രസക്തമായ തിരക്കഥയാണ്. ഈ തെരഞ്ഞെടുപ്പിലോ കേരളത്തിലെ ബി.ജെ.പിക്ക് അകത്തോ കോൺഗ്രസ് പ്രവേശനം യാതൊരു ചലനവും ഉണ്ടാക്കുന്നില്ല.
Also Read :‘വലിയ കസേരകൾ പ്രതീക്ഷിക്കുന്നില്ല; കെ. സുരേന്ദ്രന് മറുപടിയുമായി സന്ദീപ് വാര്യർ
കോൺഗ്രസിലേക്ക് പോയ സന്ദീപിനെതിരെ നേരത്തെയും പാർട്ടി നടപടി എടുത്തതാണ്. ആ നടപടി ഫേസ്ബുക്ക് പോസ്റ്റിട്ടത് കൊണ്ടൊന്നും ആയിരുന്നില്ല. അന്ന് പുറത്തു പറയാതിരുന്നത് ഒരു രാഷ്ട്രീയ പാർട്ടി പുലർത്തേണ്ട സാമാന്യമായ മര്യാദയുടെ പേരിൽ മാത്രമാണ്. അതുകൊണ്ട് വി.ഡി. സതീശനും സുധാകരനും എല്ലാ ആശംസയും നേരുന്നു. സന്ദീപ് വാര്യർ കോൺഗ്രസിൽ നീണാൾ വാഴട്ടെ എന്നും കെ. സുരേന്ദ്രൻ ആശംസിച്ചു.
