അന്നും ഇന്നും ആരൊന്ന് അണിഞ്ഞൊരുങ്ങി വന്നാലും ഉള്ള ഒരു ചോദ്യമാണ് നീയാരാ മമ്മുട്ടിയോ എന്ന്. ആ ചോദ്യത്തിന് ഒരു മാറ്റവും ഉണ്ടാവാൻ പോണില്ല എന്നത് വീണ്ടും വീണ്ടും തെളിയിക്കുകയാണ് മലയാളത്തിന്റെ മെഗാസ്റ്റാർ. ഇപ്പോഴിതാ വ്യത്യസ്ത ലുക്കിലെത്തിത്തി വീണ്ടും ആരാധകരെ അമ്പരപ്പിച്ചിരിക്കുകയാണ് താരം.
മമ്മൂട്ടി തന്നെയാണ് പുത്തൻ ലുക്ക് ഷെയർ ചെയ്തിരിക്കുന്നത്. കൂൾ ആന്റ് മാസ് ലുക്കിലാണ് മമ്മൂട്ടി ഫോട്ടോയിൽ ഉള്ളത്. ഫോട്ടോ പുറത്തുവന്നതിന് പിന്നാലെ കമന്റുകളുമായി ആരാധകരും രംഗത്ത് എത്തി. “ഞങ്ങൾ ഇനി എന്ത് ചെയ്യണം എന്ന് ഇക്ക തന്നെ പറ, അപമാനിച്ചു കഴിഞ്ഞെങ്കി, ഞങ്ങൾ അങ്ങ് പോയിക്കോട്ടെ എന്ന് യൂത്തമാർ, ഇങ്ങള് ഇത് എന്തിനുള്ള പുറപ്പാടാണ് മമ്മൂക്കാ, നിങ്ങൾ പ്രായത്തെ പറഞ്ഞു മനസിലാക്ക് ഞാൻ ആധാർ ആയിട്ടുവരാം, യുവനടന്മാരെ ജീവിക്കാൻ അനുവദിക്കൂലാലേ”, എന്നിങ്ങനെ പോകുന്നു കമന്റുകൾ.
ALLG (ആൾ ഗുഡ്) എന്ന അടികുറിപ്പോടെയാണ് ചിത്രം പങ്കുവെച്ചിരിക്കുന്നത്. നിലവിൽ ജിതിൻ കെ ജോസ് സംവിധാനം ചെയ്യുന്ന ചിത്രത്തിലാണ് മമ്മൂട്ടി അഭിനയിക്കുന്നത്. മമ്മൂട്ടിക്കൊപ്പം വിനായകനും ചിത്രത്തിൽ എത്തുന്നുണ്ട്. നാഗർകോവിലിലാണ് നിലവിൽ ചിത്രത്തിന്റെ ആദ്യ ഷെഡ്യൂൾ. ദുൽഖർ സൽമാൻ ചിത്രം ‘കുറുപ്പി’ന്റെ സഹതിരക്കഥാകൃത്തായിരുന്നു ജിതിൻ കെ ജോസ്. പ്രതിനായക സ്വഭാവമുള്ള കഥാപാത്രമായാണ് മമ്മൂട്ടി ചിത്രത്തിൽ എത്തുന്നതെന്നാണ് റിപ്പോർട്ടുകൾ.
