ഉപഭോക്താക്കളുടെ പരാതികളും സംശയങ്ങളും പരിഹരിക്കാനും പുതിയ ഉപഭോക്താക്കളെ കണ്ടെത്താനും സഹായിക്കുന്ന നിർമിത ബുദ്ധി (എ.ഐ) ജോലിക്കാരെ അവതരിപ്പിച്ച് മൈക്രോസോഫ്റ്റ്. കസ്റ്റമർ സർവിസും സപ്ലൈ ചെയിൻ മാനേജ്മെന്റും നിർവഹിക്കാൻ കഴിയുന്ന ‘വെർച്വൽ ജോലിക്കാരെ’ മൈക്രോസോഫ്റ്റിൽ നിന്ന് വാങ്ങി നമ്മുടെ ആവശ്യങ്ങൾക്ക് ഉപയോഗിക്കാം.
അടുത്തമാസം പൊതുവിപണിയിൽ ‘കോപൈലറ്റ് സ്റ്റുഡിയോ’ ബ്രാൻഡിലുള്ള ഈ എ.ഐ ബോട്ടുകൾ ലഭ്യമാക്കും. നിലവിൽ ലോകപ്രശസ്ത കൺസൾട്ടൻസി സ്ഥാപനമായ മെക്കൻസി അടക്കമുള്ള ഏതാനും കമ്പനികൾ നിലവിൽ ഇത് പരീക്ഷിക്കുന്നുണ്ട്.
പുതിയ കസ്റ്റമേഴ്സിനെ കണ്ടെത്തുന്നതുപോലുള്ള, പെട്ടെന്ന് മനസ്സ് മടുക്കുന്ന പല ജോലികളും മടുപ്പില്ലാതെ ചെയ്യാൻ എ ഐക്ക് കഴിയുമെന്നാണ് മൈക്രോസോഫ്റ്റിന്റെ അവകാശവാദം. ഈ എ.ഐ അവതാരങ്ങൾ മനുഷ്യരുടെ ജോലി കളയുമോ എന്ന ചോദ്യത്തിന്, ‘മടുപ്പുള്ള ജോലി എ.ഐ ചെയ്യട്ടെ, മനുഷ്യർ കൂടുതൽ സർഗാത്മക ജോലികളിലേക്ക് തിരിയട്ടെ’ എന്നാണ് കമ്പനിയുടെ മറുപടി.
