കൊച്ചി: മൈക്രോസോഫ്റ്റിനെ ഇന്ത്യയിലെ തന്നെ ഏറ്റവും മികച്ച തൊഴിൽ ബ്രാൻഡായി 2024-ലെ റൻഡ്സ്റ്റാഡ് എംപ്ലോയർ ബ്രാൻഡ് റിസർച്ച് റിപ്പോർട്ട് കണ്ടെത്തി. സാമ്പത്തിക ആരോഗ്യം, മികച്ച അംഗീകാരം, കൂടാതെ തൊഴിൽ രംഗത്ത് വളർച്ചയ്ക്കുള്ള അവസരങ്ങൾ തുടങ്ങി, തൊഴിൽ നൽകുന്നവരെ വിലയിരുത്തുന്ന മൂന്നു ഘടകങ്ങളിലും മൈക്രോസോഫ്റ്റ് വളരെ ഉയർന്ന നിലയിലാണെന്നു സർവേ ചൂണ്ടിക്കാട്ടുന്നു. റിപ്പോർട്ടിൽ ടിസിഎസ് രണ്ടാം സ്ഥാനത്തും ആമസോൺ മൂന്നാം സ്ഥാനത്തും എത്തി.
നിരന്തരമായി മാറിക്കൊണ്ടിരിക്കുന്ന രാജ്യത്തിന്റെ തൊഴിൽ മേഖലയിലെ ഏറ്റവും പുതിയ പ്രവണതകൾ കൂടിയാണ് സർവേ വെളിപ്പെടുത്തിയത്. ഇത്തരത്തിൽ ജീവിതവും ജോലിയും തമ്മിലുള്ള സന്തുലനമാണ് ജീവനക്കാർക്കിടയിലെ ഏറ്റവും മുൻഗണനയുള്ള ഘടകം. തുല്യമായ അവസരങ്ങൾ ലഭിക്കുന്നതാണ് അടുത്ത പ്രധാന ഘടകം. അതേസമയം വനിതാ ജീവനക്കാർക്കിടയിൽ ഇതിനു കൂടുതൽ പ്രാധാന്യമാണുള്ളത്.
നടത്തിയ സർവേ റിപ്പോർട്ട് പ്രകാരം 2024-ൽ ഇന്ത്യയിലെ ഏറ്റവും മികച്ച തൊഴിൽ ബ്രാൻഡുകൾ, മൈക്രോസോഫ്റ്റ്, ടാറ്റാ കൺസൾട്ടൻസി, ആമസോൺ, ടാറ്റാ പവർ കമ്പനി, ടാറ്റാ മോട്ടോർസ്, സാംസംഗ് ഇന്ത്യ, ഇൻഫോസിസ്, എൽ ആൻറ് ടി, റിലയൻസ് ഇൻഡസ്ട്രീസ്, മേഴ്‌സിഡസ് ബെൻസ് എന്നിവയാണ്.
അതേസമയം ജീവിതച്ചെലവ് വർദ്ധിക്കുന്നതുമായി താരതമ്യം ചെയ്യുമ്പോൾ ലഭിക്കുന്ന കുറഞ്ഞ വേതനം മൂലം 34 ശതമാനം പേരും ജോലി ഉപേക്ഷിക്കുന്നതായും സർവേ കണ്ടെത്തി. അതേ സമയം 29 ശതമാനം പേർക്കു മാത്രമേ പണപ്പെരുപ്പത്തെ മറികടക്കുന്ന വേതനം ലഭിക്കുന്നുള്ളൂ. കൂടാതെ നിർമിത ബുദ്ധി തങ്ങളുടെ ജോലിയെ വരുന്ന അഞ്ചു വർഷങ്ങൾക്കുള്ളിൽ ബാധിക്കുമെന്ന് 88 ശതമാനം പേരും വിശ്വസിക്കുന്നതായും സർവേ ചൂണ്ടിക്കാട്ടുന്നു.
അതേസമയം മികച്ച തൊഴിൽ ദാതാവ് എന്ന നിലയിലെ വിലയിരുത്തലുകൾ നടത്താൻ ബിസിനസുകൾക്കുള്ള സമഗ്രമായ ഗൈഡാണ് റൻഡ്സ്റ്റാഡ് എംപ്ലോയർ ബ്രാൻഡ് റിസർച്ചെന്ന് റൻഡ്സ്റ്റാഡ് ഇന്ത്യ മാനേജിംഗ് ഡയറക്ടറും സിഇഒയുമായ പിഎസ് വിശ്വനാഥ് പറഞ്ഞു.
