മസ്കത്ത്: വാണിജ്യ, വ്യവസായ, നിക്ഷേപക പ്രോത്സാഹന മന്ത്രാലയം 3,415 വാണിജ്യ രജിസ്ട്രേഷനുകൾ റദ്ദാക്കി. വ്യാപാര പ്രവർത്തനങ്ങൾ നിർത്തിയതോ ലൈസൻസ് കാലഹരണപ്പെട്ടതോ ആയ വാണിജ്യ രജിസ്‌ട്രേഷനുകളാണ് റദ്ദാക്കിയിരിക്കുന്നത്. വിപണി നിയന്ത്രിക്കുന്നതിനും ,സജീവമായ എല്ലാ വാണിജ്യ രജിസ്ട്രേഷനുകളും നിലവിലുള്ള നിയമങ്ങൾ പാലിക്കുന്ന സ്ഥാപനങ്ങളെ പ്രതിനിധീകരിക്കുന്നുണ്ടെന്ന് ഉറപ്പാക്കുന്നതിനുമുള്ള ശ്രമങ്ങളുടെ ഭാഗമായാണ് ഇത്തരമൊരു നടപടിയെന്ന് മന്ത്രാലയം അറിയിച്ചു .
ആദ്യ ഘട്ടത്തിന്റെ ഭാഗമായി 1970 മുതൽ 1999 വരെയുള്ള കാലയളവിൽ പ്രവർത്തനം നിർത്തിയതോ ലൈസൻസ് കാലഹരണപ്പെട്ടതോ ആയ കമ്പനികളുടെ രജിസ്ട്രേഷനാണ് റദ്ദാക്കിയിരിക്കുന്നത്. റദ്ദാക്കിയ കമ്പനികളിൽ ജോയിന്‍റ്-സ്റ്റോക്ക് കമ്പനികളോ വ്യക്തിഗത വ്യാപാരികളോ ഉൾപ്പെടുന്നില്ലെന്ന് മുബാറക് ബിൻ മുഹമ്മദ് അൽ ദോഹാനി പറഞ്ഞു.
ALSO READ: ബെയ്‌റൂട്ടിലേക്കുള്ള വിമാന സർവീസുകൾ താൽക്കാലികമായി നിർത്തി ഖത്തർ എയർവേയ്സ്
ഒമാനിൽ പ്രവർത്തിക്കുന്ന ബിസിനസുമായി ബന്ധപ്പെട്ട വിവരങ്ങൾ, കണക്കുകൾ, സ്ഥിതിവിവരക്കണക്കുകൾ എന്നിവയുടെ കൃത്യത ഉറപ്പുവരുത്തുന്നതിനും വിപണി നിയന്ത്രണത്തിനും ഈ നടപടികൾ പ്രധാനമാണ്. 2000 മുതൽ 2018 വരെ കമ്പനികളെ ഉൾപ്പെടുത്തിയുള്ള അവലോകനങ്ങളുടെ രണ്ടാം ഘട്ടം ഉണ്ടാകുമെന്നും മുബാറക് ബിൻ മുഹമ്മദ് അൽ ദോഹാനി .ആർട്ടിക്കിൾ 15ൽ അനുശാസിക്കുന്ന വാണിജ്യ രജിസ്റ്റർ നിയമ നമ്പർ (3/74) അടിസ്ഥാനമാക്കിയാണ് രജിസ്ട്രേഷൻ റദ്ദാക്കാനുള്ള തീരുമാനമെന്ന് ഡയറക്ടർ ജനറൽ വ്യക്തമാക്കി.
ഒരു വ്യാപാരി മരിക്കുക, ബിസിനസ് നടത്തുന്നത് അവസാനിപ്പിക്കുക, കമ്പനി ലിക്വിഡേറ്റ് ചെയ്യപ്പെടുക, ബ്രാഞ്ച് അല്ലെങ്കിൽ ഏജൻസി എന്നന്നേക്കുമായി അടക്കുക എന്നിങ്ങനെയുണ്ടെങ്കിൽ വാണിജ്യ രജിസ്റ്റർ റദ്ദാക്കണമെന്നാണ് നിയമം പറയുന്നത്. ഇങ്ങനെ സംഭിച്ചാൽ ഒരു മാസത്തിനുള്ളിൽ രജിസ്ട്രേഷൻ റദ്ദാക്കാനുള്ള അപേക്ഷ വ്യാപാരിയോ അവരുടെ അവകാശികളോ ലിക്വിഡേറ്ററോ കമ്പനിയോ സമർപ്പിക്കണം.
