കൊല്ലം: കൊല്ലം പൂയപ്പള്ളിയില്‍ നിന്നും ഇന്നലെ കാണാതായ വിദ്യാര്‍ത്ഥികള്‍ ശാസ്താംകോട്ടയില്‍ മരിച്ച നിലയില്‍. പൂയപ്പള്ളി മൈലോട് ദൈവനികേതത്തില്‍ ദേവ നന്ദ(17), അമ്പലംകുന്ന ചെങ്ങൂര്‍ തെക്കുംകര വീട്ടില്‍ ഷെഹിന്‍ഷാ(17) എന്നിവരാണ് മരിച്ചത്. ശാസ്താംകോട്ട തടാക തീരത്ത് ഇന്ന് രാവിലെയാണ് മൃതദേഹം കണ്ടെത്തിയത്. പൊലീസ് എത്തി മൃതദേഹങ്ങള്‍ താലൂക്ക് ആശുപത്രി മോര്‍ച്ചറിയിലേക്ക് മാറ്റി. പൂയപ്പള്ളി പൊലീസ് അന്വേഷണം ആരംഭിച്ചിട്ടുണ്ട്.
വ്യാഴാഴ്ച രാവിലെ മുതലാണ് ഇരുവരെയും കാണാതാകുന്നത്. പിന്നീട് വീട്ടുകാര്‍ പൊലീസില്‍ നല്‍കിയ പരാതിയെ തുടര്‍ന്ന് വ്യാപക അന്വേഷണം നടത്തുന്നതിനിടെയാണ് മൃതദേഹങ്ങള്‍ കണ്ടെത്തിയത്. പൂയപ്പളളി ഓടനാവട്ടം കെ.ആര്‍.ജി.പി.എം സ്‌ക്കൂളിലെ പ്ലസ് വണ്‍ വിദ്യാര്‍ത്ഥിയാണ് ദേവ നന്ദ. കൊട്ടാരക്കര ബോയ്‌സ് ഹൈസ്‌ക്കൂളിലെ പ്ലസ് വണ്‍ വിദ്യാര്‍ത്ഥിയാണ് ഷെഹിന്‍ ഷാ.
