ഒഡിഷ മുഖ്യമന്ത്രിയായി ബിജെപി നേതാവ് മോഹൻ ചരൺ മാജി ഇന്ന് സത്യപ്രതിജ്ഞ ചെയ്ത് അധികാരമേൽക്കും. പ്രധാനമന്ത്രി നരേന്ദ്രമോദി അടക്കമുള്ള പ്രമുഖർ ചടങ്ങിൽ പങ്കെടുക്കും. വൈകീട്ടാണ് മോഹൻ ചരൺ മാജിയുടെ സത്യപ്രതിജ്ഞ ചടങ്ങ്. മോഹൻ ചരൺ മാജിക്കൊപ്പം രണ്ട് ഉപമുഖ്യമന്ത്രിമാരും സത്യപ്രതിജ്ഞചെയ്യും. കെവി സിങ് ദിയോ, പ്രവതി പരിദ എന്നിവരാണ് ഉപമുഖ്യമന്ത്രിമാർ.
ഭുവനേശ്വറിൽ ഇന്നലെ ചേർന്ന ബിജെപി നിയമസഭാകക്ഷി യോഗമാണ് മോഹൻ ചരൺ മാജിയെ മുഖ്യമന്ത്രിയായി തെരഞ്ഞെടുത്തത്. ചന്ദ്രബാബു നായിഡുവിന്റെ സത്യപ്രതിജ്ഞയ്ക്ക് ശേഷം പ്രധാനമന്ത്രി നരേന്ദ്രമോദി ഉച്ചയ്ക്ക് 2.30-ന് ഭുവനേശ്വറിലെത്തും. തുടർന്ന് ഒഡിഷ മുഖ്യമന്ത്രിയുടെ സത്യപ്രതിജ്ഞാ ചടങ്ങിൽ പങ്കെടുക്കാൻ രാജ്ഭവനിലേക്ക് പോകും. നാലാം തവണയാണ് മോഹൻ ചരൺ മാജി എംഎൽഎയാകുന്നത്. ഒഡീഷയിലെ കെന്ദൂഝർ മണ്ഡലത്തിൽ നിന്ന് 11,577 വോട്ടുകൾക്കായിരുന്നു വിജയം.
