പത്തനംതിട്ട: ശബരിമല തീര്‍ഥാടകര്‍ക്ക് എരുമേലിയില്‍ കൂടുതല്‍ സൗകര്യങ്ങള്‍ ഏര്‍പ്പെടുത്തുന്നതിനായി പാര്‍ക്കിങ് സൗകര്യം വിപുലീകരിക്കും. കെഎസ്ആര്‍ടിസി എരുമേലി ഡിപ്പോയില്‍ നിന്നുള്ള ശബരിമല സര്‍വീസുകളുടെ എണ്ണം 20 ആയി വര്‍ധിപ്പിച്ചിട്ടുണ്ട്. കഴിഞ്ഞ കാലങ്ങളിലുണ്ടായ പോരായ്മകള്‍ പരിഹരിക്കുന്നതിന് വിവിധ വകുപ്പുകളുടെ നേതൃത്വത്തിലുള്ള പ്രവര്‍ത്തനങ്ങളും യോഗം വിലയിരുത്തി.
Read Also: വളര്‍ത്തുനായ, വീട്ടുജോലിക്കാര്‍, രത്തന്‍ ടാറ്റ ആരെയും മറന്നില്ല; വില്‍പത്ര വിവരങ്ങള്‍ ഇങ്ങനെ
എരുമേലിയില്‍ ഭവനനിര്‍മാണ ബോര്‍ഡിന്റെ കീഴിലുള്ള ആറരയേക്കര്‍ സ്ഥലം ശുചിമുറി സൗകര്യങ്ങള്‍ അടക്കമുള്ളവ റവന്യു വകുപ്പ് സജ്ജമാക്കി നല്‍കും. കൂടുതല്‍ ചാര്‍ജിങ് സ്റ്റേഷനുകള്‍ ഏര്‍പ്പാടാക്കും. മാലിന്യസംസ്‌കരണത്തിന് തദ്ദേശ സ്വയംഭരണവകുപ്പും ശുചിത്വമിഷനും പദ്ധതികള്‍ നടപ്പാക്കും. ശബരിമലയുമായി ബന്ധപ്പെട്ട എല്ലാ റോഡുകളുടെയും അറ്റകുറ്റപ്പണികള്‍ പൂര്‍ത്തിയാക്കുമെന്ന് പൊതുമരാമത്ത് വകുപ്പും യോഗത്തില്‍ അറിയിച്ചു. എരുമേലി ദേവസ്വം ഹാളില്‍ ചേര്‍ന്ന അവലോകനയോഗത്തില്‍ മന്ത്രി വി എന്‍ വാസവന്‍, തിരുവിതാംകൂര്‍ ദേവസ്വം പ്രസിഡന്റ്, എം എല്‍ എ മാര്‍ തുടങ്ങിയവര്‍ പങ്കെടുത്തു.
