ആരും അത്ഭുതപ്പെടേണ്ട ! ഇത് പൊള്ളുന്ന ചൂടിലും, തുളച്ചുകയറുന്ന ആണവ വികിരണങ്ങളിലും, കൊടും തണുപ്പിലും ജീവിക്കാൻ കഴിയുന്ന ഭൂമിയിലെ ഏറ്റവും ‘റഫ് ആൻഡ് ടഫ്’ ജീവി ടാർഡിഗ്രേഡ്. നല്ല തടിച്ചു തുടുത്ത ശരീരം, എട്ടുകാലുകൾ, ഓരോ കാലുകളോടും ചേർന്നു നഖങ്ങൾ പോലുള്ള കൈകൾ ഇതാണ് ഈ കുഞ്ഞന്റെ കാഴ്ചയിലെ രൂപം. മൊത്തത്തിൽ ഒരു കരടിയോടു സാമ്യം തോന്നുന്ന രൂപം എന്നിവയുള്ള വ്യത്യസ്തനായ ജീവി. ഇപ്പോഴിതാ പുതിയൊരിനം ടാർഡിഗ്രേഡുകളിൽ പഠനം നടത്തിയിരിക്കുകയാണ് നമ്മുടെ ശാസ്ത്രജ്ഞർ. ടാർഡിഗ്രേഡുകൾ എങ്ങനെ വികിരണങ്ങളെ ചെറുക്കുമെന്നായിരുന്നു ഈ പഠനത്തിന്റെ ലക്ഷ്യം.
ഈ സവിശേഷതയെക്കുറിച്ച് കൂടുതൽ പഠിച്ചാൽ ബഹിരാകാശ യാത്രികർക്ക് ഉപകാരപ്രദമാകുമെന്നാണ് ശാസ്ത്രജ്ഞർ കരുതുന്നത്.വികിരണങ്ങളുടെ സാന്നിധ്യത്തിൽ സജീവമാകുന്ന ഒരുകൂട്ടം ജീനുകളാണ് ടാർഡിഗ്രേഡുകൾക്ക് സംരക്ഷണം നൽകുന്നതെന്നാണ് കണ്ടെത്തൽ. വികിരണങ്ങൾ മൂലമുണ്ടാകുന്ന ജനിതകഘടനയുടെ തകരാറിൽ നിന്ന് ഈ ജീനുകൾ ടാർഡിഗ്രേഡിനെ രക്ഷിക്കും. ടാർഡിഗ്രേഡുകൾ ഭൂമിയിൽ നടന്ന ഗ്രേറ്റ് ഡയിങ് എന്ന വൻ വംശനാശ പ്രക്രിയയെയും അതിജീവിച്ച ജീവികളാണ്. അന്ന് ഈ പ്രക്രിയയെ അതിജീവിക്കാൻ ടാർഡിഗ്രേഡുകൾ ശാരീരികമായി തന്നെ ചില സവിശേഷതകൾ കൈവരിച്ചു. ആ സവിശേഷതകൾ ഇന്നും ഭൂമിയിലെ ഏറ്റവും സ്ഥിരതയുള്ള ജീവികളായി നിലനിൽക്കാൻ ടാർഡിഗ്രേഡുകളെ ഏറെ അനുവദിക്കുന്നുണ്ട്.
Also Read : ഡിജിറ്റൽ അറസ്റ്റ്; തട്ടിപ്പുകാർക്ക് പണികൊടുത്ത യുവാവ്, മൻ കി ബാത്തിൽ മോദി പറഞ്ഞ കഥ
ആശാനേ ശരിക്കൊന്നു കാണാൻ മൈക്രോസ്‌കോപ് തന്നെ വേണം
വാട്ടർ ബെയർ, മോസ് പിഗ്ലെറ്റ് എന്നീ ചെല്ലപ്പേരുകളിലും ടാർഡി അറിയപ്പെടുന്നു. ആയിരക്കണക്കിനു തരത്തിലുള്ള ടാർഡിഗ്രേഡുകളുണ്ട്. ഇത്തിരി കുഞ്ഞൻമാരാണ് ഈ ജീവികൾ. ശരിക്കും കൂടിപ്പോയാൽ ഒരു മില്ലിമീറ്റർ, ഇതാണ് ഇവയുടെ നീളം. ആശാനെ ശരിക്കൊന്നു കാണാൻ മൈക്രോസ്‌കോപ് വേണം. പാറക്കെട്ടുകളിൽ പറ്റിപ്പിടിച്ചുവളരുന്ന പച്ചപ്പായലുകളിൽ, തടാകങ്ങളുടെ അടിത്തട്ടിൽ, കുളങ്ങളിൽ, മണ്ണിൽ, മഞ്ഞുമൂടിയ ഹിമാലയത്തിൽ,കെട്ടിടങ്ങളുടെ മേൽക്കൂരയിൽ …ചുരുക്കി പറഞ്ഞാലും പരത്തി പറഞ്ഞാലും എല്ലായിടത്തും ടാർഡിയുണ്ട്. അതിൽ തന്നെ അൽപം നനവുള്ള പ്രദേശങ്ങളാണ് ഇവയ്ക്ക് കൂടുതൽ ഇഷ്ടം.
ചില നോൺവെജ് ടാർഡികളുടെ പ്രധാനഭക്ഷണം ബാക്ടീരിയയാണ്. ഇനി മറ്റു ചില ഭീകരൻമാരും ഇക്കൂട്ടത്തിലുണ്ട്. ഇവയുടെ ഭക്ഷണം മറ്റുള്ള ടാർഡിഗ്രേഡുകളാണ്. പായലിൽ നിന്നും സസ്യങ്ങളിൽ നിന്നുമുള്ള ജ്യൂസ് കുടിക്കുന്ന വെജിറ്റേറിയൻ ടാർഡിഗ്രേഡുകൾ ഒട്ടേറെയുണ്ട്. 2007ൽ യൂറോപ്യൻ സ്‌പെയ്‌സ് ഏജൻസി വിട്ട ഫോട്ടോൺ എം3 ദൗത്യത്തിൽ കുറച്ചു ടാർഡിഗ്രേഡുകളെ അയച്ചിരുന്നു. 10 ദിവസത്തെ ബഹിരാകാശവാസത്തിനു ശേഷം ദൗത്യം തിരികെയെത്തി. തിരിച്ചെത്തുമ്പോൾ പന്തുരൂപത്തിൽ കിടന്ന ടാർഡിഗ്രേഡുകളെ ശാസ്ത്രജ്ഞൻമാർ വെള്ളം തളിപ്പിച്ചെഴുന്നേൽപ്പിച്ചു. സൂര്യനിൽ നിന്നുള്ള കടുത്ത അൾട്രാവയലറ്റ് കിരണങ്ങളുൾപ്പെടെ കടുത്ത പ്രതിബന്ധങ്ങളൊന്നും ഈ ഇത്തിരി കുഞ്ഞന്മാരെ ഒട്ടും ബാധിച്ചിട്ടില്ലെന്ന് ഉറപ്പാക്കി, ടാർഡിഗ്രേഡുകൾ സ്മാർട്ടായി എഴുന്നേറ്റു നടന്നു.
Also Read :എന്ത് ! മരണം പ്രവചിക്കുന്ന എ.ഐ കാൽക്കുലേറ്ററോ..
അങ്ങനെയൊന്നും ചാവില്ലെടാ….
അങ്ങനെയൊന്നും തന്നെ കൊല്ലാൻ കഴിയില്ലെന്ന് ആണ് ടാർഡിയുടെ കോൺഫിഡൻസ്, അല്ല അത് സത്യവുമാണ്. ആണവസ്‌ഫോടനം, ഛിന്നഗ്രഹ ആക്രമണം, വരൾച്ച…..ലോകാവസാനം സംഭവിച്ചാൽ പോലും, ടാർഡിയുടെ രൂപത്തിൽ ഭൂമിയിൽ ജീവൻ ബാക്കിയാകുമെന്നു വിദഗ്ധർ പറയുന്നു. വിഷവസ്തുക്കൾ, വെട്ടിത്തിളയ്ക്കുന്ന വെള്ളം ഇവയെയൊക്കെ പ്രതിരോധിക്കാനും ടാർഡിക്കു പറ്റും. ജീവിവർഗങ്ങളിൽ ഭൂരിപക്ഷവും വെള്ളം കിട്ടാതായാൽ എങ്കിലും ചത്തൊടുങ്ങും. എന്നാൽ ടാർഡിയുടെ കൈയ്യിൽ ‘ക്രിപ്‌റ്റോബയോസിസ്’ എന്നൊരു വിദ്യയുണ്ട്. വെള്ളം കിട്ടില്ലെന്നുറപ്പായാൽ എട്ടുകാലുകളും മടക്കി ശരീരത്തിലേക്കു ചേർത്തു സ്വയം ഒരു പന്തുപോലെയാകും. എന്നിട്ടു സമാധി അവസ്ഥയിൽ ഒറ്റക്കിടപ്പ് കിടക്കും. ഈ ടാർഡിപ്പന്തിനുള്ളിൽ ഉത്പാദിപ്പിക്കുന്ന ചില രാസവസ്തുക്കൾ ടാർഡിയെ സംരക്ഷിക്കും. പിന്നീട് വെള്ളം കിട്ടുന്ന അവസ്ഥ വന്നാൽ ടാർഡി ഈ അവസ്ഥ വിട്ടു പഴയരൂപത്തിലേക്കു വരും.
Also Read :ദേ വരുന്നു… വ്യാഴാഴ്ച രാത്രി ഭൂമിക്കരികിലൂടെ ഒരു കൊള്ളിയാൻ പായും!
ആളെ കാണാൻ മൈക്രോസ്‌കോപ്പൊക്കെ വേണമെങ്കിലും ആരാധകരുടെ എണ്ണത്തിൽ ആശാൻ പുലിയാണ്. ടാർഡിക്കു വേണ്ടി ഓൺലൈൻഗ്രൂപ്പുകളും ബ്ലോഗുകളുമൊക്കെ ഒട്ടേറെയാണ്. ടാർഡിക്കു വേണ്ടി ആരാധകർ വരച്ച ചിത്രങ്ങൾ, ടാർഡിയുടെ ചിത്രം പതിച്ച ടീഷർട്ടുകൾ എന്നിവയൊക്കെയുണ്ട്. പ്രശസ്ത സയൻസ് ഫിക്ഷൻ ടിവി പരമ്പരയായ സ്റ്റാർട്രെക്കിലും ടാർഡിയുണ്ട്. ചില പരീക്ഷണങ്ങൾ പാളിപ്പോയതിനാൽ അസാമാന്യമായി വലുപ്പം വച്ച ‘റിപ്പർ’ എന്ന ഈ ഭീകരൻ ടാർഡിഗ്രേഡ് മനുഷ്യരെ വെറുതെ വിടാത്ത ഒരു വില്ലനായിട്ടാണു ആ പരമ്പരയിൽ. എന്നാൽ യാഥാർഥ ടാർഡിഗ്രേഡ് മനുഷ്യർക്കൊന്നും യാതൊരു പ്രശ്‌നവും ഉണ്ടാക്കാത്ത, സ്വന്തം കാര്യം നോക്കി ഇൻട്രോവേർട് ആയിട്ടുള്ള ഒരു നിഷ്‌കളങ്കനാണെന്നതാണു സത്യം.
